Əfvsiz Novruz?

Ümidlərə baxmayaraq, bu il Novruz ərəfəsində dövlət başçısı əfv fərmanı imzalamadı. Baxmayaraq ki, neçə illərdir Novruz ərəfəsində bu ənənəyə riayət olunurdu. Sonuncu dəfə əfv fərmanı 2013-cü ilin oktyabrında prezident seçkilərindən sonra verilib. Beləliklə, İlham Əliyev yenə beynəlxalq birliyin və Azərbaycan ictimaiyyətinin ona siyasi məhbusları azad etmək çağırışlarına məhəl qoymayıb. Maraqlıdır ki, bu, ölkənin Avropa Şurası Nazirlər Komitəsinə sədrliyə başlaması fonunda baş verir.

Hazırda həbsxanalarda çox sayda jurnalist, bloger, gənc fəal, müxalifət partiyalarının fəalları saxlanılır. Media Hüququ İnstitutunun məlumatına görə, KİV-də və İnternetdə nəşrlərinə görə təqib edilən 9 jurnalist və 6 bloger barmaqlıqlar arxasındadır.

“Xural” qəzetinin baş redaktoru Əvəz Zeynallı 2011-ci ilin oktyabr ayında parlamentin o vaxtki deputatı Gülər Əhmədovanın şikayəti ilə həbs edilib və 9 il müddətinə azadlıqdan məhrum edilib.

Jurnalist Fərəməz Novruzoğlu (Allahverdiyev) 2012-ci ilin aprelində iğtişaşlara çağırış və sərhədi qanunsuz keçmək ittihamı ilə 4,5 il müddətinə azadlıqdan məhrum edilib.

Ucar rayonundan jurnalist Fuad Hüseynov 2010-cu ildə həbs edilib və xuliqanlıq ittihamı ilə 6,5 il müddətinə azadlıqdan məhrum edilib. Hüquq müdafiəçiləri hesab edirlər ki, həbsin əsl səbəbi yerli polisin insan alverində əli olması haqqında nəşrlərdir.

Xeber44.com dini saytın baş redaktoru Araz Quliyev 2012-ci ilin sentyabrında dindarların Masallı şəhərində rəqs müsabiqəsinə etiraz aksiyası zamanı həbs edilib və 8 il azadlıqdan məhrumetmə cəzası alıb. Həbsindən əvvəl o, dəfələrlə hakimiyyəti dindarların hüquqlarını pozduğuna görə tənqid edib.

“Tolışi Sədo” qəzetinin redaktoru Hilal Məmmədov 21 iyun 2012-ci il tarixində həbs edilib. 2013-cü il sentyabrın 27-də dövlətə xəyanət, milli ayrı-seçkilik salmaq və narkotik saxlamaq ittihamı ilə ciddi rejimli cəzaçəkmə müəssisəsində saxlanmaqla 5 il müddətinə həbs edilib.

“P.S. Nota” qəzetinin və www.psnota.com online-nəşrin redaktoru Sərdar Əlibəyli 31 iyul 2013-cü ildə saxlanılıb. Ona qarşı 221.3-cü maddə ilə xuliqanlıq ittihamı irəli sürülüb.

Noyabrın 13-də məhkəmə Əlibəylini 4 il müddətinə azadlıqdan məhrum edib.

www.moderator.az saytının direktoru və “Bizim yol” qəzetinin əməkdaşı Pərviz Həşimli 17 sentyabr 2013-cü ildə silah qaçaqmalçılğı və ticarəti ittihamı ilə həbs edilib.

Azadxeber.org dini saytının redaktoru Nicat Əliyev narkotik saxlamaq ittihamı ilə 9 il müddətinə həbs edilib.

Bu iş üzrə daha 9 dindar keçir. İttihamların irəli sürülməsinə Bakıda “Eurovision” müsabiqəsini tənqid edən videofilmin sosial şəbəkələrdə yayılması səbəb olub.

“Yeni Müsavat” qəzetinin icmalçısı və Müsavat Partiyasının sədr müavini Tofiq Yaqublu 17 mart 2014-cü ildə İsmayıllı iğtişaşlarının təşkilinə görə 5 il müddətinə həsb edilib.

Bu jurnalistlərdən başqa, 6 sosial şəbəkə fəalı həbsdədir.

Bloger Rəşad Ağaaddin (Ramazanov) 9 may 2013-cü ildə Bakıda heroin saxlamaq ittihamı ilə saxlanılıb və 8 il müddətinə həbs edilib.

O, hakimiyyəti kəskin şəkildə tənqid edir və İlham Əliyevin üçüncü müddət üçün prezident vəzifəsinə namizədlik irəli sürməsinə istehza edirdi. Başqa bir yazısında Ağaaddin Azərbaycan hakimiyyətini “məlun Əliyev rejimi” adlandırırdı.

Daha 3 bloger Bakıda 10 mart 2013-cü il etiraz aksiyasında kütləvi iğtişaşlar planlaşdırmaq ittihamı ilə təqsirləndirilən NİDA fəallarının işi üzrə keçir.

Belə ki, onlardan biri – “Azad Gənclik” hərəkatının üzvü İlkin Rüstəmzadə 2013-cü ilin mayında Bakı bulvarında “Harlem Shake” rəqsini “ifa etdiyinə” görə həbs edilib. Bu, xuliqanlıq kimi tövsif edilib. Baxmayaraq ki, Rüstəmzadə özü kənarda dayanıb.

Bu iş üzrə təqsirləndirilən daha iki şəxs – Bəxtiyar Quliyev və Məmməd Əzizov facebook-da hakimiyyəti tənqid edən “Heydər Əliyev adına” səhifənin administratoru idi.

Facebook-da “Yaltaqlara dur deyək!”, “Seçki saxtakarlıqları” səhifələrinin administratoru Əbdül Əbilov 22 noyabr 2013-cü ildə qanunsuz narkotik ticarəti ittihamı ilə həbs edilib.

Bloger Ömər Məmmədov 2014-cü ilin mayında eyni ittihamla həbs edilib.

O, facebook-da hakimiyyətin ələ salındığı “AzTV-dən alıntılar” səhifəsinin administratorlarından biri idi.

Sülh və Demokratiya İnstitutunun, Hüquq-müdafiə və Maarifləndirmə Cəmiyyətinin, Hüquqi Araşdırmalar üzrə Beynəlxalq Cəmiyyətin məlumatına görə, Azərbaycanda siyasi məhbusların ümumi sayı 130 nəfərdən çoxdur. -06B-