Ekspert: “İmzatoplama kampaniyası gərgin keçəcək”

Bakı/05.12.19/Turan: Azərbaycanda növbədənkənar parlament seçkiləri 2020-ci il fevralın 9-na təyin edilib. Bu barədə prezident İlham Əliyev sərəncam imzalayıb. "Azərbaycan Respublikası Milli Məclisinin beşinci çağırışının buraxılması və Azərbaycan Respublikasının Milli Məclisinə növbədənkənar seçkilərin təyin edilməsi haqqında” sərəncama əsasən, seçkilər gələn il fevral ayının ikinci bazar günü keçiriləcək.

Hüquqşünas Ələsgər Məmmədli hesab edir ki, seçkilərin gələn il fevralın 9-a təyin edilməsi hüquqi tərəfdən heç bir problem yaratmır. “Dekabrın 23-də ölkədə keçiriləcək bələdiyyə seçkiləri bitməmiş parlament seçkilərinin elan edilməsi hüquqi tərəfdən qəbulediləndir. Parlament seçkiləri bələdiyyə seçkilərdən 2 ay sonra keçiriləcək. Sadəcə, seçki komissiyaları gərgin vəziyyətdə işləyəcək, onların işi ağırlaşacaq. Bu baxımdan narahatlıq ola bilər. Bir də imzatoplama kampaniyası gərgin keçəcək. Çünki qısa vaxtda 450 imzanı yığmaq bir az çətindir”.

Ekspert hesab edir ki, namizədlərin təbliğat-təşviqat kampaniysı üçün  seçkilərə vaxtın az qalması da hüquqi tərəfdən əngəl deyil. Azərbaycanda seçki öncəsi təbliğat 22 gün çəkir və bu, elan olunduğu dövrə tam uyğundur. –0--