Ekspert vəkilliyin dəstəklənməsi ilə bağlı hakimiyyətin addımlarını tənqid edir (YENİLƏNİB)

Bakı/23.02.18/Turan: Azərbaycan prezidentinin 22 fevral sərəncamına əsasən vəkilliyin inkişafı ilə bağlı nəzərdə tutulan tədbirlər əslində vəkilliyin hökumətin nəzarətinə götürülməsi deməkdir. Bu barədə hüquq sahəsində ekspert Elman Fəttah bildirib.

Vəkillərin peşəkarlığının artırılması, vəkillik institutunun möhkəmləndirilməsi və əhalinin etibarlı müdafiəsinin təmin edilməsi barədə fikirlər sözdən başqa bir şey deyil.

"Əgər belədirsə, ən peşəkar, səriştəli, vicdanlı vəkillərin uydurma bəhanələrlə Kollegiyadan xaric edilməsini nə ilə izah etmək olar?

Ona görə də sərəncamda yazılanlar real həyatda baş verənlərə uyğun gəlmir", - E.Fəttah qeyd edib.

Vəkil xidmətlərinə görə ödənişlərin həcminin artırılmasında, Kollegiyanın və regionlarda hüquq məsləhətxanalarının bina ilə təmin edilməsində məqsəd vəkilliyi hakimiyyətin nəzarətinə götürməkdir.

"Bundan öncə hakimiyyət KİV və məhkəmələri nəzarətə götürüb. İndi də vəkilliyin üzərində nəzarət yaradır. Faktiki müstəqli vəkillik institutu yox olmaqdadır", - E.Fəttah vurğulayıb.-06D--

* * *

2018 Fevral 23 (Cümə) 14:21:14

Prezidentdən vəkillik sərəncamı

Bakı/22.02.18/Turan: Fevralın 22-də prezident İlham Əliyev Azərbaycanda vəkilliyin inkişafı ilə bağlı əlavə tədbirlər haqqında sərəncam verib.

Sənəddə deyilir ki, sərəncamın məqsədi məhkəmə-hüquq sisteminin təkmilləşdirilməsi və müasirləşdirilməsi sahəsində görülən işlər çərçivəsində vəkilliyin inkişafına dəstək verməkdir.

Sərəncama görə, Nazirlər Kabineti iki aya Vəkillər Kollegiyasını (VK) Bakıda müvafiq bina ilə təmin etməlidir. Bundan başqa Gəncə, Lənkəran, Sumqayıt, Şəki və Şirvan şəhərlərində VK-nin vəkil qurumları da müvafiq binalarla təmin olunmalıdır.

Sənəddə həmçinin vəkilin xidmətlərini ödəmək üçün kifayət qədər vəsaiti olmayan şəxslərə dövlət hesabına göstərilən hüquqi yardıma görə müəyyən edilmiş məbləğin 3 dəfə artırılması nəzərdə tutulur.

Hazırda həmin məbləğ bir saat üçün 2 manat təşkil edir.

Nazirlər Kabinetinə həmçinin tapşırılıb ki, Vəkillər Kollegiyasının istifadəsində olan binaların təmiri, kompüter və digər avadanlığın, nəqliyyat vasitələrinin alınması məqsədilə vəsait ayırsın.

Sərəncamda Vəkillər Kollegiyasına tövsiyələr də yer alıb.

Kollegiya vəkil olmaq istəyənlər üçün ixtisas imtahanlarının müntəzəm keçirilməsini təşkil etməli, kollegiyaya gənc hüquqşünasların qəbul edilməsi üçün xüsusi şərait yaratmalıdır.

Bundan başqa kollegiyaya şəhər və rayonlarda vəkillərin fəaliyyətinin stimullaşdırılması üçün tədbirlər hazırlayıb həyata keçirməsi, aztəminatlılara pulsuz hüquqi xidmətlər göstərilməsi tövsiyyə olunur.

Hökumət ötən ilin sonlarından vəkillik sahəsini tənzimləyən qanunlara xeyli dəyişiklik edib.

Milli Məclis oktyabrın 31-də "Vəkillər və vəkillik fəaliyyəti haqqında" Qanuna, Mülki və İnzibati Prosessual məcəllələrə dəyişikliklər edib. Prezident də bunu təsdiqləyib. Bu dəyişikliklərdən sonra nümayəndəlik institutunun fəaliyyəti ciddi şəkildə məhdudlaşdırılıb. Vəkillər Kollegiyasının üzvü olmayanlar məhkəmələrdə vətəndaşların hüquqlarını müdafiə edə bilməzlər.

Vəkillər Kollegiyasının üzvlərinin sayı 900-dən bir qədər artıqdır.

Ekspertlər hesab edir ki, qeyd olunan dəyişikliklərdən sonra ölkədə vəkil qıtlığı yarana bilər.

Azərbaycan adambaşına düşən vəkil sayına görə, Avropa sıralamasında son yerlərdə dayanır.--0---