Əli Həsənov: Devalvasiya qaçılmaz idi

Dövlət başçısının köməkçisi Əli Həsənov AzərTAc vasitəsilə dekabrın 21-də milli valyutanın kəskin ucuzlaşması ilə bağlı şərh verərək, bu tədbiri məcburi və zəruri addım adlandırıb.

“Son günlər Azərbaycanda hamıya məlum idi ki, “üzən məzənnəyə” keçid prosesi qaçılmaz həddə çatıb və Mərkəzi Bank bunu nəzərə almaq məcburiyyətindədir”.

Əksər ölkələrdə, o cümlədən Çin, Rusiya, Türkiyə, Qazaxıstan və s. ölkələrdə valyutalar çoxdan “üzən məzənnəyə” keçirilib.

“Manatın sabitliyi və yüksək məzənnəsi ilə əlaqədar Azərbaycanda daxili istehsalat tədricən azalırdı. Bu vəziyyətdə manatın məzənnəsinin liberallaşdırılması qaçılmaz idi”.

Azərbaycan neft hasil edən ölkədir və bu, dövlət büdcəsinin əsas gəlir mənbəyidir. İlin əvvəllərindən neft üç dəfə ucuzlaşıb və Azərbaycanın gəlirləri də üç dəfə azalıb. Azərbaycan Mərkəzi Bankı uzun müddəti bu defisiti öz resursları hesabına ödəməyə çalışıb. Amma daimi tənzimləmə ölkə iqtisadiyyatına daha güclü zərbə vura bilərdi, deyə Həsənov bildirib.

Daha sonra o, neft qiymətlərinin azalmasının arxasında ABŞ-ın durduğu barədə maraqlı qeyd edib.

“ABŞ Rusiyanı iqtisadi cəhətdən zəiflətmək üçün dünyada neft qiymətlərinə süni təsir etmək siyasəti seçib. Bunun üçün Vaşinqton əvvəlcə OPEK-i nəzarəti altına götürüb və müxtəlif yollarla bu təşkilatın qiymətlərlə bağlı qərar qəbul etmək imkanlarını məhdudlaşdırıb. Daha sonra Amerika neft ixracına 40 illik qadağanı ləğv edib. Eyni zamanda uçot dərəcəsi artırılıb ki, bu da dolların mövqeyini möhkəmləndirərək, digər ölkələrin valyutalarını zəiflədib”, deyə Həsənov bildirib.

Bizim hökumətimiz bunun nəticələrini vətəndaşlar üçün maksimum ağrısız etməyə çalışır. Daxili istehsalın stimullaşdırılması, kölgə iqtisadiyyatının – inhisarın, korrupsiyanın tamamilə aradan qaldırılması üçün bütün addımlar atılacaq, deyə o fikrini tamamlayıb. -02D-