Əli Həsənovun yaddaşına nə olub?

Bakı/03.09.19/Turan: Hakimiyyətin keçmiş ideoloqu Əli Həsənov, deyəsən, hamıya məlum olan faktları təhrif edərək, Azərbaycanın ən yeni tarixini yenidən yazmaq qərarına gəlib.

Həsənovun Facebook-da paylaşdığı bugünki kəşflərdən sonra belə bir təəssürat yaranır. Belə ki, dövlət başçısının köməkçisi utanmadan Azərbaycanın 7 rayonunun Heydər Əliyevin hakimiyyətə gəlməsindən sonra işğal edilməsi faktını təkzib etməyə çalışır.

"Həmin illərin canlı şahidləri hələ də Azərbaycanın demoqrafik balansıda mühüm çəkiyə malikdirlər və yaxşı xatırlayırlar ki, Dağlıq Qarabağ və ona bitişik yeddi rayon Heydər Əliyevin rəsmi olaraq Azərbaycan prezidenti seçilməsindən əvvəl işğal edilib. Azərbaycanın sonuncu işğal edilmiş rayonu - Zəngilan 1193-cü ilin oktyabrında erməni silahlı birləşmələri tərəfindən ələ keçirilib. Həmin vaxt Azərbaycanın legitim prezidenti Əbülfəz Elçibəy idi", deyə Həsənov yazır.

Amneziyadan əziyyət çəkənlərə xatırlatmaq istərdim ki, 1993-cü ilin iyununda hərbi çevriliş nəticəsində Əbülfəz Elçibəy hökuməti devrilib. O, özü Heydər Əliyevi hakimiyyətə dəvət edərək, Bakını tərk etmək məcburiyyətində qalıb.

Bu gün hakimiyyət hər il 15 iyunu Qurtuluş Günü - yəni Heydər Əliyevin hakimiyyətə qayıdışı günü kimi təmtəraqla qeyd edir.

Məhz bu tarixdən sonra Ağdam (iyul), Cəbrayıl və Füzuli (avqust), Qubadlı (avqust), Ağdrə (iyul), Zəngilan (oktyabr) işğal edilib.

Elçibəy hökuməti zamanında yalnız Kəlbəcər (aprel, 1993) işğal edilib. -02D-