Əliyev və Putin Monitorinq Mərkəzinin açılmasını və ikitərəfli məsələləri müzakirə etdilər

Bakı / 30.01.21 / Turan: Şənbə günü Azərbaycan və Rusiya Prezidentiləri arasında telefon danışığı oldu.

Məlumata görə, İ.Əliyev Ağdam rayonunda Rusiya-Türkiyə Birgə Monitorinq Mərkəzinin fəaliyyətə başlaması ilə əlaqədar V.Putini təbrik edib.

Rusiya Prezidenti təbrikə görə minnətdarlıq bildirib. Dövlət başçıları bu Mərkəzin fəaliyyətinin bölgədə uzunmüddətli sülhün və sabitliyin təmin olunması işinə xidmət edəcəyini vurğulayıblar.

Hər iki Prezident 2020-ci il noyabrın 10-da imzalanmış üçtərəfli Bəyanatın nəqliyyat-kommunikasiya bəndinin müddəalarının icrası ilə bağlı Moskvada Azərbaycan, Rusiya, Ermənistan baş nazirlərinin müavinləri səviyyəsində keçirilən görüşün əhəmiyyətini qeyd ediblər.

Məlumatda vurğulanır ki, söhbət zamanı strateji tərəfdaşlığa əsaslanan Azərbaycan-Rusiya dostluq münasibətlərinin hərtərəfli inkişafından məmnunluq ifadə edilib, əlaqələrin  bundan sonra da möhkəmlənəcəyinə əminlik bildirilib.-0-