Əliyev və Zərif Azərbaycanla-İran əlaqələrin ən yüksək səviyyədə olduğunu düşünürlər

Bakı/25.05.21/Turan: “Biz əlaqələrimizin müsbət məcrada inkişafını, inkişaf edən ikitərəfli əlaqələri geniş şəkildə müzakirə edəcəyik. Mən sizin səfərinizdən əvvəl məlumatlara baxdım və gördüm ki, bizdə ticarət dövriyyəsində artım var. Pandemiyaya baxmayaraq, bu, çox müsbətdir”, - Azərbaycan prezidenti İlham Əliyev İranın xarici işlər naziri naziri Məhəmməd Cavad Zərifi qəbul edərkən deyib.

Əliyev bildirib ki, hazırda iki ölkə arasında əlaqələr bəlkə də əməkdaşlığın tarixində ən yüksək səviyyədədir.

“Əlbəttə ki, regionda yeni vəziyyətin - münaqişədən sonrakı vəziyyətin yaranması ilə əlaqədar yeni imkanlar, yeni çağırışlar var və sözsüz ki, İran və Azərbaycan iki qardaş ölkə olaraq səyləri əlaqələndirməli, regionda bütün bölgə ölkələrinin xeyrinə uzunmüddətli və dayanıqlı sülh şəraitində inkişafa töhfə verməlidir. Əminəm ki, İran hökuməti də eyni yanaşmanı paylaşır”, - dövlət başçısı qeyd edib.

İranın xarici işlər naziri Məhəmməd Cavad Zərif deyib ki, İran Azərbaycanla münasibətlərinin ən yaxşı dövrünü yaşayır: “Hakimiyyətdə olduğumuz dövr başa çatdığı bir vaxtda İranda hakimiyyətə gələcək növbəti administrasiya üçün qardaş ölkə olan Azərbaycanla mükəmməl münasibətləri miras qoyaraq getdiyimizə görə çox şadıq”.

“Biz sizin Azərbaycan torpaqlarının azad edilməsində tarixi rol oynadığınıza inanırıq və sizi təbrik edirik. İndi isə regiona sülh gətirmək üçün tarixi bir rol oynaya bilərsiniz və biz sizi Ermənistanla sülhə nail olmaq arzusunu ifadə etdiyiniz üçün təqdir etmək istəyirik. Bu, çox önəmlidir və biz buna nail olmaq, həmçinin işğaldan azad edilmiş ərazilərin yenidən qurulmasında və bərpasında İranda hər hansı bir rolu oynamağa hazırıq”, - o qeyd edib. -03-