Elşən Həsənov: "Komandiri azadlığa buraxıblar, onun əmr etdiyi əsgərlər ömürlük həbsdədir"

Bakı/26.04.19/Turan: Aprelin 26-da "Siyasi Məhbuslara Azadlıq" İttifaqı "Siyasi məhbuslara, o cümlədən ömürlük məhbuslara azadlıq" mövzusunda dinləmələr keçirib. Dinləmələrin nəticəsi olaraq insan hüquqlarının tam bərpa olunması, o cümlədən siyasi və ömürlük məhbuslara azadlıq, söz və fikri ifadə etmək azadlığı, ədliyyə-məhkəmə sisteminin yenidən qurulması, hüquq müdafiəçiliyi və nümayəndəlik institutunun bərpa edilməsi, işgəncələrin qadağan edilməsi tələb edilir.

Müzakirələrə Sülh və Demokratiya Institutunun dırektoru, hazırda mühaciritədə olan Leyla Yunus da qoşulub. O bildirib ki, Azərbaycan hökuməti Avropa Şurasına üzv olankən ömürlük məhbusların işinə yenidən baxılacağı ilə bağlı öhdəlik götürüb.

"Hökumət Avropa Şurası qarşısında siyasi və ömürlük məhbuslarla bağlı götürdüyü öhdəliyi hələ də yerinə yetirməyib", - o qeyd edib.

"Siyasi Məhbuslara Azadlıq" İttifaqının koordinatoru Elşən Həsənov bildirib ki, prezidentin bu il martın 16-da imzaladığı əfv sərəncamı siyasi məhbus problemini həll etməyib.

"Bizim təşkilatın siyahısında 138 nəfər siyasi məhbus var idi. Əfv sərəncamından sonra yenə də 87 nəfər siyasi məhbus həbsdə qalır. Bununla yanaşı 20 ilədək cəza çəkən ömürlük məhbuslar hələ də Qobustan qapalı həbsxanasındadır," - o qeyd edib.

"Siyasi Məhbuslara Azadlıq" İttifaqının bəyanatında əfv komissiyasından tələb olunur ki, ömürlük həbsə məhkum edilmiş və 20 ildən çox həbsdə saxlanılmış bir çox şəxslər şərtsiz azad edilməlidir.

"Həmin şəxsləri həbsdə saxlamağın nə hüquqi, nə də humanitar əsası var. 1998-ci il fevralın 10-da Milli Məclis ölüm cəzasının ömürlük həbs cəzası ilə əvəz edilməsi barədə qanun qəbul etdi. Qanunun qəbul olunmasına baxmayaraq, hüquqi əsasların olması üçün ömürlük həbsə məhkum edilmiş hər bir məhbus barəsində məhkəmə qərarı olmalıdır. O vaxt ölüm cəzasına məhkum edilən 128 nəfər var idi. Onlardan 30-a yaxını artıq həbsxanada dünyasını dəyişib, qalanları xəstədir, hökumət və cəmiyyət üçün heç bir təhlükə törətmir".

Hüquq müdafiəçisnin sözlərinə görə, qanun ömürlük həbsə məhkum edilən şəxslərin hamısına eyni şərtlərlə şamil edilib.

"Nəzərə alsaq ki, artıq 20 il həbsdə saxlanılıblar. 20 il ərazində bu şəxslərin heç birinin qayda pozuntusu olmayıb. Bu şəxslər Avropa insan haqları dəyərlərinə, Azərbaycan Konstitusiyasına görə azad olunmalıdır. Keçmiş baş nazir Surət Hüseynov azadlığa buraxılıb. Amma Surət Hüseynovun komandanlıq etdiyi "Qaranquş dəstəsi"nin üzvləri hələ də həbsdədir. Amma onlara əmri verən Surət Hüseynov azadlıqdadır. Belə ədalət ola bilməz", -E. Həsənov qeyd edib. -03B-