Siyasi mühacirin qohumları polisdə dindirilib

Bakı/26.04.19/Turan: Avropada mühacirətdə olan Vüqar Niftiyevin aprelin 25-də polisə aparılan atası və qardaşı axşam saatlarında sərbəst buraxılıb.

V.Niftiyevin Turan-a verdiyi məlumata görə, səhər saatlarında onun 70 yaşlı əlil atası Əzizağa Niftiyevə Cəlilabad rayon polis şöbəsinə çağırılıb, qardaşı Vüsal Niftiyev isə iş yerindən şöbəyə aparılıb.

V.Niftiyevin sözlərinə görə, bu, artıq dördüncü dəfədir ki, qohumları polisə aparılır. Bu dəfə bölmədə V.Niftiyevə çağırışının rəsmi səbəbini bildirməsələr də Vüqarın göstərişilə yaşadığı Göytəpədə hakimiyyət əleyhinə təbliğat aparılmasında və qardaşını maliyyələşdirməsində günahlandırıblar. "Qardaşımın balaca sexi var, orada qazandığı pullarla güclə iki ailəsini dolandırır, məni necə maliyyələşdirsin ki?"

Fəal onun Avropadakı fəaliyyətinə görə Azərbaycanda yaşayan qohumlarının polisə çağırılmasını ağlasığmaz adlandırıb.

Cəlilabad polisi şərh verməkdən imtina edib.

Hüquq müdafiəçisi Oqtay Gülalıyev Turan-a bildirib ki, son vaxtlar xaricdə yaşayan fəalların ailə üzvlərinə təzyiqlər artıb. Bu yaxınlarda Valeh Nəsibovun, Orxan Ağayevin də yaxın qohumlarını polis bölmələrinə aparmışdılar. O.Gülalıyev bunun səbəbini həmin ictimai-siyasi fəalların Avropada Azərbaycandakı korrupsiya hallarına qarşı, siyasi məhbuslara dəstək olaraq müəyyən aksiyalar keçirməkdə görür. "Hakimiyyətin mühacirlərə olan son təzyiqləri ölkədə yaratmaq istədiyi qorxu xofununun davamıdır. Amma mən düşünmürəm ki, bu təzyiqlərə görə fəallar öz fəaliyyətini dayandıracaqlar", - hüquq müdafiəçisi bildirib.

Hüquq müdafiəçisi Rəsul Cəfərov isə bildirib ki, heç kəs öz fəaliyyətinə görə, rəsmi şəxslərin ünvanına tənqidlərinə görə cəzalandırılmamalıdır. Həmin insanların qohumlarının hər hansı formada cəzalandırılmasını isə R.Cəfərov sovet dövründən qalma praktika adlandırıb. "Nə ölkə qanunvericiliyi, nə də Azərbaycanın üzv olduğu beynəlxalq təşkilatların qarşısında götürdüyü öhdəliklər buna imkan verir. Bu, ölkə adına utanc gətirir".

R.Cəfərov hakimiyyəti vətəndaşların hüquq və azadlıqlarını pozan, ölkənin imicinə xələ gətirən bu cür hallara yol verməməyə çağırıb. Bunu edən şəxslər isə vəzifəsindən və rütbəsindən asılı olmayaraq cəzalandırılmalıdır.-0-