E.Məmmədyarov: Ermənistan Qarabağ münaqişəsinin sülh yolu ilə tənzimlənməsinə mane olur

Dublin/06.12.12/Turan. “Dağlıq Qarabağ münaqişəsi əvvəlki kimi beynəlxalq təhlükəsizlik üçün ciddi çağırış olaraq qalmaqdadır. Ermənistan status-kvonu möhkəmləndirir, ATƏT nizamnaməsini pozaraq, Azərbaycanın işğal edilmiş əraziləri üzərində nəzarəti qoruyub saxlamaq üçün güc tətbiq edir”.

Turan-ın xüsusi müxbirinin Dublindən verdiyi məlumata görə, bu barədə bu gün ATƏT XİN Şurasının 19-cu iclasında Azərbaycan XİN rəhbəri Elmar Məmmədyarov bildirib.

O, çıxışında ATƏT məkanında təhlükəsizlik və mövcud münaqişələrin həlli məsələsinə toxunub.

Nazir qeyd edib ki, Ermənistan icmalararası dialoqa, qaçqınların öz evlərinə qayıtmasına, regionun iqtisadi inkişafına mane olur, Azərbaycan mədəniyyətinin bütün əlamətlərini silməyə çalışır. “Azərbaycanın işğal edilmiş ərazilərində dağıdılmamış Azərbaycan mədəniyyəti abidəsi qalmayıb”, deyə Azərbaycan naziri bildirib.

O qeyd edib ki, Ermənistan tərəfin Xocalı aeroportundan istifadə etmək cəhdi narahatlıq doğurur. “Bu, təxribatçı addımdır, etimadı pozur və regionda vəziyyəti gərginləşdirir”, deyə Məmmədyarov bildirib.

Bununla belə, bu münaqişənin sülh yolu ilə həllinin alternativi olmadığını bildirən Məmmədyarov qeyd edib ki, Azərbaycan sülh danışıqlarının davam etdirilməsində maraqlıdır.

“Biz ATƏT MQ-nin işini fəallaşdırmağı və hərtərəfli sülh sazişi hazırlamağa başlamağı təklif edirik”, deyə azərbaycanlı nazir bildirib. -04C-