Entoni Blinken Respublika Günü münasibətilə Azərbaycanı təbrik edib

Vaşinqton/28.05.21/Turan: “Amerika Birləşmiş Ştatları hökuməti adından Azərbaycan xalqını Respublika Günü bayramı və 1918-ci ildə müsəlman dünyasında ilk demokratik hökumətin qurulması münasibətilə təbrik edirəm”, deyə ABŞ dövlət katibi Entoni Blinkenin 28 may tarixli bəyanatında bildirilir.

“Birləşmiş Ştatlar Azərbaycanla iqtisadiyyat, energetika və təhlükəsizlik sahəsində otuz illik tərəfdaşlığı, həmçinin Azərbaycanın insan hüquqları və qanunun aliliyinə hörməti artırmasında dair daimi dialoqumuzu yüksək qiymətləndirir.

Azərbaycanın Cənub Qaz Dəhlizi vasitəsilə Avropanın energetika imkanlarının şaxələnməsinə verdiyi böyük töhfəni təsdiq edirik.

İnsan hüquqlarına və əsas azadlıqlarına hörmət edən güclü institutlar və proseslər, qanunun aliliyi, şəffaflıq və hesabatlılıq ortaq məqsədlərimizə nail olmağımız və daha möhkəm və dərin əlaqələr qurmağımız üçün həddindən artıq əhəmiyyətlidir.

Birləşmiş Ştatlar həmçinin minlərlə Azərbaycan və Amerika vətəndaşı arasında şəxsi mübadilələr, habelə səfirliklərimizin ictimaiyyətlə işi vasitəsilə qurulmuş əlaqələrə dəyər verir.

Birləşmiş Ştatlar ATƏT-in Minsk Qrupunun həmsədri qismində Dağlıq Qarabağ münaqişəsinin uzunmüddətli siyasi həlli və hərbi əməliyyatların humanitar nəticələrinin aradan qaldırılması, o cümlədən itkin düşmüş şəxslər nəzərə alınmaqla, bütün saxlanılan şəxslərin azad edilməsi, habelə cəsədlərin tam və operativ şəkildə dəyişdirilməsi üzrə danışıqlarda tərəflərə köməklik göstərməyə əvvəlki kimi hazırdır”, deyə sənəddə qeyd edilir. -02D-