Media-icmal 28.05.21

“Müsavat.com” saytında “Əkrəm Həsənov: Problemli kreditlər artsa da, bu dəfə proses daha yüngül keçəcək” sərlövhəli məqalədə bank sektorundakı vəziyyət dəyərləndirilir.

Ekspertə görə, bank sistemində neqativ məqamlardan biri problemli kreditlərin artması ilə bağlıdır.

Onun sözlərinə görə, vaxtı keçmiş kreditlərin məbləği bu il mayın 1-nə 921,5 milyon manat təşkil edib ki, bu, aprelin 1-i ilə müqayisədə 0,4% çoxdur, bu ilin əvvəlinə nisbətən 3,2% artıb, son 1 ildə isə 25,2% azalıb.

Həsənovun sözlərinə görə, aprelin sonuna vaxtı keçmiş kreditlərin ümumi kredit portfelində xüsusi çəkisi 6,1% təşkil edib, bu nisbət ötən ilin sonuna 6,1%, ötən il aprelin sonuna isə 8,1% olub.

Ekspert düşünür ki, problemli kreditlər bu il ərzində böyük ehtimalla artacaq, amma vəziyyət 2015-ci ildəki kimi dramatik olmayacaq: “Əksər borclular iş fəaliyyətini və ya biznes fəaliyyətini bərpa etdikcə kreditlərini ödəyəcəklər.

Elə biznes sahələri də olacaq ki, onlar yaxın illərdə onsuz da bərpa oluna bilməyəcəklər. Bu, əsasən turizm sektoru ilə bağlıdır”, Həsənov belə deyib.

“Modern.az” saytında isə “Deputatlar banklara qarşı birləşdilər: İnsanların nəfəsini kəsirlər!” sərlövhəli məqalədə bank-müştəri münasibətləri təhlil edilir.

Müəllif deyir ki, parlamentin mayın 27-də keçirilən iclasında kredit ittifaqları haqqında qanun layihəsinin müzakirəsi zamanı deputatlar bankları tənqid ediblər.

Onların fikrincə, banklar bütün dəyərləri tapdalayıb, insanların nəfəsini kəsirlər. Deputatlar təklif ediblər ki, bank haqqında qanun yenidən müzakirəyə çıxarılsın.

“Bankların özbaşına fəaliyyətinə imkan verməyən məsələlər hazırlansın. İnzibati Xətalar Məcəlləsində məsələ qeyd edilsin. Bankların şəffaflığı, hesabatlılığı yoxdur, bir bank 24, digər bank 30, BOKT-lar 35 faizlə kredit verir. Belə şey olar?”, deyə deputatlar etiraz ifadə ediblər.

Deputatlara görə, Azəbaycanda “Banklara etibar varmı?” sualı qoyulsa  azəbaycanlılar birmənalı “yox” cavabı verəcək. Eyni zamanda, deputatlar bunu vətəndaşlara “maliyyə şiddəti” kimi dəyərəndiriblər.

“Moderator.az”  saytında “Belə təxribatların əsas məqsədi Kollektiv Təhlükəsizlik Müqaviləsi Təşkilatını (KTMT) bu işlərə cəlb etməkdir” sərlövhəli məqalədə isə mayın 27-si Ermənistan-Azərbaycan sərhədində erməni tərəfin törətdiyi təxribatın səbəbləri müzakirə edilir. Deputat Arzu Nağıyev hesab edir ki, Ermənistanda seçkilər (iyun ayının 20-də Ermənistanda parlament seçkisi keçiriləcəyi gözlənilir -red.) yaxınlaşdıqca belə təxribatlar olacaq.

“Əsas məqsədləri ondan ibarətdir ki, Azərbaycan tərəfinin guya demarkasiya, delimitasiya adı altında qanunsuz iş görməsini büruzə versinlər və KTMT-ni bu işlərə cəlb etsinlər. Radikal qruplaşmalar isə seçkinin təxirə salınması üçün Ermənistan ərazisində fövqəladə vəziyyət tətbiq etmək istəyirlər”. 

A.Nağıyevə görə, belə təxribatların səbəblərindən biri də Ermənistan ordusundakı xaosdur, belə ki, kimlərəsə tabe olan müxtəlif hərbi birləşmələr var və onlar baş nazir Paşinyan tərəfindən idarə edilmir.