Erdoğan Ermənistanla münasibətlərin normallaşdırılması təklifini təkrar edib

Bakı/11.12.20/Turan: Qarabağda qələbə Qafqaz tarixində yeni səhifə açıb. Əminəm ki, regionun tarixi bundan sonra tamamilə fərqli məcrada inkişaf edəcək. Bu barədə Türkiyə prezidenti Recep Tayyip Erdoğan Bakıdan Ankaraya yola düşərkən jurnalistlərlə söhbətində bildirib.

Türkiyə lideri qeyd edib ki, Azərbaycanın işğal edilmiş torpaqlarının azad edilməsi uğrunda 44 günlük müharibənin hər bir gününü şəxsən izləyib.

“Biz Azərbaycanı təhdidlərlə baş-başa qoymamışıq. XİN, Müdafiə Nazirliyi və kəşfiyyat idarəsinin nümayəndələri Azərbaycanlı həmkarları ilə sıx əlaqə saxlayıblar. Bundan başqa, bizim nümayəndələrimiz daim Azərbaycana səfər ediblər”, deyə Erdoğan bildirib. Onun sözlərinə görə, İlham Əliyevlə telefon danışıqları silsiləsi baş tutub.

Türkiyə lideri dünən Bakıda səsləndirilmiş Cənubi Qafqazda “Altılı platforma”nın (Azərbaycan, Türkiyə, Rusiya, İran, Gürcüstan və Yerevan istəsə, Ermənistan) yaradılması təşəbbüsünə diqqət çəkib. “Ermənistan bu prosesdə iştirak etməyə qərar versə və müsbət addımlar atsa, Türkiyə-Ermənistan münasibətlərində yeni səhifə açıla bilər”, deyə Erdoğan bildirib.

Türkiyə liderinin sözlərinə görə, Türkiyənin üzərində işlədiyi “Altılı platforma” qarşılıqlı səmərəli əməkdaşlıq meydanına çevriləcək.

Türkiyə prezidenti həmçinin Azərbaycan prezidenti İlham Əliyevin Fransa parlamentinin ermənipərəst addımlarına cavab mövqeyini yüksək qiymətləndirib.

“İlham Əliyevin dəqiq mövqeyi Emmanuel Makronun niyyətlərini pozub. Məhz Makronun Fransa-Azərbaycan münasibətlərinin üstündən qələm çəkəcəyini istisna etmirəm. Bütün bunlar onun siyasi təcrübəsizliyinin göstəricisidir”, deyə Erdoğan bildirib. -02D-