Azərbaycanlı siyasətçilər və ekspertlər Rusiya sülhməramlılarının Qarabağdan çıxarılmasını tələb edirlər

Bakı/11.12.20/Turan: Azərbaycanın siyasi partiyalarının və ictimai təşkilatlarının rəhbərlərindən, Azərbaycan diasporunun nümayəndələrindən ibarət bir qrup beynəlxalq ictimaiyyətə Rusiya “sülhməramlı” qoşunlarının Azərbaycan ərazilərindən çıxarılmasını təmin etmək çağırışı ilə beynəlxalq ictimaiyyətə müraciət edib.

BMT-yə, BMT TŞ-nin daimi üzvlərinə, Avropa Parlamentinə, AŞPA-ya, ATƏT-ə, Qoşulmama Hərəkatının Koordinasiya Bürosuna, BMT-nin Qaçqınlar üzrə Ali Komissarlığına, UNESCO-ya ünvanlanmış müraciətdə qeyd edilir ki, Dağlıq Qarabağ və Azərbaycanın ona bitişik 7 rayonu vaxtilə Ermənistan tərəfindən Rusiyanın dəstəyi ilə işğal edilib.

Müəlliflər qeyd edirlər ki, 44 günlük müharibədən sonra Rusiya “sülhməramlılarının” yerləşdirilməsi beynəlxalq normalar pozulmaqla həyata keçirilib.

Rusiya qoşunları BMT mandatı olmadan yerləşdirilib.

Rusiya mahiyyətcə hərbi bazalar yaradıb, öz qüvvələrini sülhməramlılıq fəaliyyəti ilə bir araya sığmayan döyüş silahları ilə təchiz edib.

Rusiya hökuməti sülhməramlıların fəaliyyətinin nizamlanması haqqında sazişi Azərbaycan hökuməti ilə deyil, işğalçı Ermənistanın hökuməti ilə imzalayıb, bununla da Azərbaycan Respublikasının suveren hüquqlarını pozub.

1991-ci ildə Azərbaycan parlamentinin qərarı ilə “Dağlıq Qarabağ muxtar vilayəti”nin ləğv edilməsinə və Azərbaycanın bəzi regionlarında inzibati-ərazi vahidlərinin dəyişdirilməsinə baxmayaraq, Rusiya “sülhməramlıları” öz missiyalarını aşaraq, Kəlbəcər və Tərtər rayonlarında keçmiş Ağdərə rayonunun yaşayış məntəqələrinin bir hissəsini nəzarəti altına alıb.

Rusiya “sülhməramlıları” “humanitar dəhliz” yaradılması barəsində razılaşmanı bəhanə edərək Azərbaycanı işğaldan azad olunmuş Laçın şəhərinə və Ermənistanla sərhədin 5 km eni boyu əraziyə nəzarət etmək imkanlarından məhrum ediblər, bu da ölkəmizin ərazi bütövlüyünün qorunmasına və dövlət sərhədlərinin toxunulmazlığına qarşı qəsd və işğalçılıq aktıdır.

Rusiya hökuməti işğalçılıq niyyətlərini reallaşdırmaq məqsədilə keçmiş “Dağlıq Qarabağ vilayəti”nə daxil olan rayonların əksər hissəsinin Azərbaycanın yurisdiksiyasına keçməsinə və həmin yerlərdə müvafiq dövlət orqanlarının yaradılmasına mane olur.

Rusiya “sülhməramlıları” işğalçı Ermənistanla sıx əməkaşlıq edərək separatçı “Dağlıq Qarabağ Respublikası” yaratmağa və onu müstəqil dövlət kimi tanıtmağa çalışır.

Müraciət müəllifləri hesab edirlər ki, “Sülhməramlı” missiya ilə bir araya sığmayan qanunsuz əməllərə yol verdiyinə, işğalçı Ermənistanla və qondarma “Dağlıq Qarabağ Respublikası”nın separatçı-terrorçu başçıları ilə sıx əməkdaşlıq şəraitində fəaliyyət göstərdiyinə və Azərbaycan dövlətinin suveren hüquqlarını pozduğuna görə Rusiyanın hərbi qüvvələri təxirə salınmadan ölkə ərazisindən çıxarılmalıdır.

Rusiya və Fransa qərəzsiz və tərəfsiz olmaq barəsində öz üzərlərinə götürdükləri öhdəliklərini və müvafiq Beynəlxalq Konvensiyaların şərtlərini kobudcasına pozduqlarına görə Minsk qrupunun həmsədrliyindən kənarlaşdırılmalıdır.

Rusiyanın təhriki və hərbi-siyasi dəstəyi ilə bölgədə və bütün Qafqaz regionunda sülhü və beynəlxalq təhlükəsizliyi təhdid etdiyinə və işğal qoşunlarının qeyd-şərtsiz Azərbaycanın ərazisindən çıxarılması barəsində BMT-nin Təhlükəsizlik Şurasının qətnamələrini yerinə yetirmədiyinə görə Ermənistana qarşı müvafiq sanksiyalar tətbiq edilməli və digər təsirli tədbirlər görülməlidir.

Müraciəti Vahid Azərbaycan Milli Birlik Partiyasının sədri Hacıbaba Əzimov, Vətəndaş və İnkişaf Partiyasının sədri Əli Əliyev, Azadlıq Partiyasının sədri Əhməd Oruc, Klassik Xalq Cəbhəsi Partiyasının sədri Mirmahmud Mirəlioğlu, Azad Demokratlar Partiyasının sədri Sülhəddin Əkbər, Demokratiya və Rifah Hərəkatının sədri Qubad İbadoğlu, ABŞ-ın Şimali Karolina Universitetinin professoru Əli Əsgərov, professor Tofiq Şahtaxtinski, Demokratik Dəyişim Platformasının rəhbəri Əli Mustafayev, Şərq-Qərb Araşdırmaları Mərkəzinin rəhbəri Ərəstun Oruclu, Təhlükəsizlik Araşdırmaları Mərkəzinin rəhbəri İlham İsmayıl, Jurnalistikanın İnkişafına Yardım Mərkəzinin rəhbəri Qulu Məhərrəmli, Beynəlxalq “Borçalı” Cəmiyyətinin rəhbəri Zəlimxan Məmmədli imzalayıblar.

Elə həmin qrup “Rusiya “sülhməramlıları”nın Azərbaycan Respublikasının ərazi bütövlüyünə və dövlət suverenliyinə qarşı yönəldilmiş bütün hərəkətlərinin qarşısının alınması üçün zəruri tədbirlər həyata keçirmək” çağırışı ilə Azərbaycan və Türkiyə prezidentləri İlham Əliyev və Recep Tayyip Erdoğana ayrı-ayrılıqda müraciətlər qəbul edib.

Həmçinin, Rusiya “sülhməramlıları”nın və erməni separatçılarının nəzarəti altında olan Xankəndində və ətraf ərazilərdə Azərbaycanın suveren hüquqlarının və müvafiq dövlət orqanlarının fəaliyyətinin bərpa olunması ilə bağlı təxirəsalınmaz tədbirlər görülməsi xahişi yer alır.

Türkiyə Cumhuriyyətinin hərbi kontingentinin keçmiş Dağlıq Qarabağ vilayətini əhatə edən ərazilərdə yerləşdirilməsi və onun Azərbaycanın hərbi birləşmələri ilə birgə həmin ərazilərdə atəşkəsə və dinc yaşayışa nəzarəti təmin etməsi üçün müvafiq saziş və müqavilələr bağlanılması təklif edilir.

““Sülhməramlı” missiya ilə bir araya sığmayan qanunsuz əməllərə yol verdiyinə, işğalçı Ermənistanla və qondarma “DQR”-in separatçı-terrorçu rejiminin başçıları ilə sıx əməkdaşlıq şəraitində fəaliyyət göstərdiyinə və Azərbaycan dövlətinin suveren hüquqlarını pozduğuna görə Rusiyanın hərbi qüvvələri təxirə salınmadan ölkə ərazisindən çıxarılsın”, deyə sənəddə bildirilir.

Həmçinin milli və beynəlxalq hüququn norma və prinsiplərini pozmaqla Sovet İttifaqının mərkəzi orqanları tərəfindən Ermənistanın tərkibinə verilən Zəngəzur qəzasının və digər ərazilərin Konstitusiya Aktının 4-cü maddəsinin tələblərinə müvafiq olaraq Azərbaycanın yurisdiksiyasına qaytarılması ilə bağlı siyasi və hüquqi-siyası tədbirlər hazırlanıb həyata keçirilməsi təklif edilir. -06D-