Ərdoğan və Putin “taxıl əqdini” müzakirə ediblər, RF rəhbəri Türkiyəyə səfər edəcək

Bakı/02.08.23/Turan: Türkiyə prezidenti Rəcəb Tayyib Ərdoğan bu gün Rusiya Federasiyasının başçısı Vladimir Putinlə telefonla danışıb.

“Anadolu” agentliyi xəbər verir ki, iki ölkə liderləri Putinin Türkiyəyə səfəri ilə bağlı razılığa gəliblər.

Telefon danışığı zamanı ikitərəfli münasibətlərlə bağlı məsələlərlə yanaşı, Ukraynadakı vəziyyətlə bağlı məsələlər də müzakirə olunub.

Ərdoğan Rusiya-Ukrayna münaqişəsinin gərginləşməsinə səbəb ola biləcək addımlardan çəkinməyə çağırıb. Türkiyə lideri Qara Dəniz Taxıl Təşəbbüsünü “sülh körpüsü” adlandırıb və qeyd edib ki, onun uzun müddət dayandırılması heç kimə xeyir verməyəcək və bundan ən çox zərəri məhsula ehtiyacı olan aztəminatlı ölkələr görəcək.

Dövlət başçısı qeyd edib ki, taxıl sövdələşməsi dayandırıldıqdan sonra taxılın qiyməti 15 faiz artıb, onun satılması zamanı isə 23 faiz azalıb. 

Prezident vurğulayıb ki, Türkiyə Qara Dəniz Taxıl Təşəbbüsünün genişləndirilməsi üçün fəal səylərini davam etdirəcək və diplomatiyadan istifadə edəcək.

Çərşənbə günü Rusiya prezidentinin mətbuat katibi Dmitri Peskov Moskvanın taxıl müqaviləsini bərpa etməyə nə vaxt hazır olacağını açıqlayıb.

"Moskva dərhal taxıl sazişinə qayıtmağa hazırdır. Lakin Rusiya üçün şərtlər yerinə yetirildikdən sonra", - Peskov vurğulayıb.

Daha əvvəl Putin bildirib ki, Rusiya Rusiya Federasiyasının taxıl və gübrələrinin dünya bazarlarına tədarükü ilə bağlı sanksiyaların, bu tədarüklərə xidmət göstərən ölkənin bankları və maliyyə institutları üçün maneələrin aradan qaldırılmasını, Rusiyanın kənd təsərrüfatı sənayesi ilə bağlı aktivlərinin üzərində qadağanın götürülməsini tələb edir. 0