Erik Rubin: Demokratiya ABŞ-ın Azərbaycanla dialoqunun mühüm hissəsidir

ABŞ dövlət katibi köməkçisinin Avrasiya məsələləri üzrə müavini Erik Rubin Azərbaycan rəsmiləri ilə aparılmış danışıqlardan məmnudur. O, görüşlərin yüksək səviyyədə keçirildiyini bildirib. Səfirliyin məlumatına görə, o, müdafiə naziri Zakir Həsənov, xarici işlər nazirinin müavinləri Araz Əzimov və Mahmud Məmmədquliyev, habelə Prezident Administrasiyası rəhbərinin müavini Novruz Məmmədovla görüşüb.

Dekabrın 5-də axşam bu görüşlərin yekunlarına həsr olunmuş mətbuat konfransında o, gələcək 2014-cü ilin ikitərəfli münasibətlərdə “irəliləyişlər ili” olacağına ümid etdiyini bildirib.

Vaşinqtonun Azərbaycanda bu yaxınlarda keçirilmiş prezident seçkilərini kəskin şəkildə tənqid etməsi fonunda rəsmilərlə demokratiya məsələlərini müzakirə edib-etməməsi haqqında suala cavabda Rubin bildirib ki, demokratiya və insan hüquqları iki ölkə arasında münasibətlərin mövcud olduğu 20 ildən çoxdur ki, hər zaman ikitərəfli dialoqun tərkib hissəsidir. Bundan sonra da belə olacaq, deyə o inandırıb.

“ABŞ Azərbaycanın müstəqilliyini və suverenliyini dəstəkləyir. Bütün bunların əsasında iqtisadi irəliləyiş, vətəndaş cəmiyyəti, müdafiə qabiliyyəti və açıq dövlət durur”, deyə o bildirib.

Ermənistan və Azərbaycan XİN rəhbərlərinin görüşünə toxunan diplomat uzunmüddətli fasilədən sonra yüksək səviyyədə danışıqların bərpasını alqışlayıb və sülh prosesini fəallaşdırdığına ümid etdiyini bildirib.

Rubin həmçinin Azərbaycanın Əfqanıstandakı əməliyyatlara, bu ölkəyə yük daşınmasına töhfəsini alqışlayıb. O, Əfqanıstandan qoşunların çıxarılmasından sonra da Şərq-Qərb nəqliyyat dəhlizinin uğurla fəaliyyət göstərəcəyinə ümidini bildirib. 

ABŞ-dan Azərbaycana silah tədarükü ilə bağlı embarqonun aradan qaldırılması imkanları haqqında suala cavabda Rubin bildirib ki, yeni müdafiə naziri ilə görüşüb və Vaşinqton səbrsizliklə müdafiə və təhlükəsizlik sahəsində əməkdaşlığın genişləndirilməsini gözləyir.

Lakin silah tədarükü onun səlahiyyətlərinə aid deyil, deyə Rubin bildirib. -03С06-