Erməni ekspert Ermənistanın iri regional enerji layihələrindən kənarlaşdırılmasında Bakının uğurunu etiraf edir

Bakı/05.08.19/Turan: Enerji təhlükəsizliyi üzrə ekspert Vaqe Davtyan Soçidə Bakı, Tehran və Moskva arasında keçiriləcək üçtərəfli sammitdən narahatdır. Sammitin gündəliyinə Ermənistanın maraqların zidd layihələr, məhz Azərbaycan infrastrukturu vasitəsilə İran və Rusiyanın enerji sistemlərinin sinxronlaşdırılması daxildir.

Avqustda Soçidə keçiriləcək Bakı-Tehran- Moskva üçtərəfli görüşü Ermənistana ziyan vuracaq, çünki "Şimal-Cənub" enerji dəhlizi Ermənistanın iştirakını nəzərdə tutmur.

"2018-ci ildən başlayaraq Bakı Moskva və Tehranın iştirakı ilə fəal danışıqlar aparır. Danışıqlar Azərbaycan vasitəsilə İran və Rusiyanın enerji sistemlərinin sinxronlaşdırılmasına yönəlib. Bu, o demək deyil ki, tərəflər Ermənistan vasitəsilə dəhlizdən imtina edəcəklər, ancaq mən düşünürəm ki, İran-Ermənistan dəmir yolu ilə olduğu kimi, bu layihə də ritorika səviyyəsində qalacaq", - Tert.am saytı Davtyandan sitat gətirib.

Davtyanın sözlərinə görə, Bakı özünün enerji diplomatiyasından effektiv vasitə formalaşdıra bilib və bundan qaz, eləcə də elektrik enerjisi məsələsində istifadə edir. "Təəssüf ki, bizim belə diplomatik alətimiz yoxdur", - ekspert etiraf edib

Şimali Avropa ilə Hind okeanını birləşdirmək üçün nəzərdə tutulmuş "Şimal-Cənub" beynəlxalq nəqliyyat dəhlizi öz logistikasına Cənubi Qafqaz komponentini də daxil edir.

2008-ci ildə Moskva İran-Ermənistan dəmir yolu layihəsini planlaşdırmışdı. Onun reallaşması üçün Rusiyanın Fars körfəzinə çıxışını təmin etməklə Rusiya, Abxaziya, Gürcüstan və Ermənistanı birləşdirən dəmir yolu istismara verilməliydi. O zaman Moskva Abxaziya dəmir yolunun idarə olunmasını öz üzərinə götürmüşdü və eyni zamanda Gürcüstan dəmir yolunun idarə edilməsilə bağlı Tbilisi ilə qapalı danışıqlara başlamışdı, Davtyan deyib.

Hazırda Azərbaycan və Türkiyə energetika izolyasiya proqramını və Ermənistanın blokadasını həyata keçirirlər ki, bu da müxtəlif layihələrdə özünü göstərir, o qeyd edib.-02D-