Ermənilər Azərbaycanın Laçın və Qarabağdakı mövqelərini atəşə tutublar

Bakı/22.06.23/Turan: İyunun 22-də saat 02:15-də Ermənistan silahlı qüvvələrinin bölmələri Gorus rayonunun Brun yaşayış məntəqəsi istiqamətində yerləşən mövqelərindən Azərbaycan ordusunun  Laçın rayonunun Əhmədli yaşayış məntəqəsi istiqamətində yerləşən mövqelərini atıcı silahlardan atəşə tutub.

Bundan əlavə,  iyunun 21-də saat 23:05-dən iyunun 22-i saat 08:15-dək Rusiya sülhməramlı kontingentinin müvəqqəti yerləşdiyi Azərbaycan ərazisindəki qanunsuz erməni silahlı dəstələrinin üzvləri  Azərbaycan ordusunun Xocavənd, Şuşa və Xocalı rayonları istiqamətlərində yerləşən mövqelərini atıcı silahlardan fasilələrlə atəşə tutulub.

Azərbaycan bölmələri qeyd olunan bütün istiqamətlərdə adekvat cavab tədbirləri görüblər.

Həmçinin erməni silahlı birləşmələri  kənd təsərrüfatı işləri adı altında Azərbaycan ordusunun  Ağdam və Xocalı rayonları istiqamətlərində yerləşən mövqelərinin qarşısında uzunmüddətli fortifikasiya qurğularını quraşdırmağa cəhd göstəriblər.

Azərbaycan ordusunun bölmələri tərəfindən görülən təxirəsalınmaz tədbirlər nəticəsində aparılan mühəndis işləri dərhal dayandırılıb.06B