Ermənilər Laçını tərk edir

Bakı/27.11.20/Turan: Qarabağ separatçılarının administrasiyası etiraf edib ki, noyabrın 30-na qədər Laçını tərk etməlidir. Ermənistan mətbuatı yazır ki, şəhərdə olan sakinlərə ən gec noyabrın 30-da şəhəri tərk etmək əmr olunub.

“Administrasiyadan deyiblər ki, getməlisiniz, əşyalarınızı yığın, noyabrın 30-na qədər hamı getməlidir. Dekabrın 1-də burada heç kim qalmamalıdır”, deyə Aysor.am yerli sakindən sitat gətirir.

“Dünən və bu gün bizi gərgin vəziyyətdə saxlayıblar, indi isə qəti qərar qəbul edilib ki, biz gedirik”, deyə həmin sakin qeyd edib.

İndiyə qədər separatçıların nümayəndələri vaxtaşırı Ermənistana gedən yol Laçından keçdiyi üçün bu şəhərin ermənilərin nəzarəti altında qalacağı haqqında bəyanatlar səsləndirirdilər.

Amma 10 noyabr tarixli üçtərəfli sazişə əsasən, Laçın dekabrın 1-də Azərbaycana qaytarılmalıdır. Şəhərdə həmçinin yolu - “Laçın dəhlizi”ni mühafizə edən rus sülhməramlıları qalacaq.

Xatırladaq ki, Laçın rayonu 1992-ci il mayın 18-də, Şuşanın işğalından 10 gün sonra işğal edilib.

Laçında heç vaxt ermənilərin yaşayış məntəqələri olmayıb, bu, sırf azərbaycanlıların yaşadığı rayondur. -02D-