Ermənistan Azərbaycanla sülh müqaviləsini ləngidir - X.Hacıyev

 Bakı/14.11.23/Turan: Ermənistan hakimiyyəti Azərbaycanla sülh müqaviləsi bağlamaq prosesini ləngidir. Bu barədə noyabrın 14-də Azərbaycan Prezidentinin Xarici siyasət məsələləri üzrə köməkçisi Hikmət Hacıyev özünün “Twitter” hesabında yazıb.

“Sentyabrın 11-də Azərbaycan sülh sazişinin 5-ci düzəliş edilmiş variantını müvafiq qeydlər ilə birlikdə ikitərəfli kanallar vasitəsilə Ermənistan tərəfinə çatdırıb ki, Ermənistanın cavabını tezliklə təqdim eləsin.

Bu ilin sonunadək sülh müqaviləsini imzalamağa hazır olması barədə bəyanatlarına baxmayaraq, erməni tərəfi sənədin öz variantını təqdim etməyi iki aydan çox yubanır.

Azərbaycan tərəfi dəfələrlə bəyan edib ki, indi tarixi fürsətdir və xüsusilə Azərbaycanın suverenliyini bərpa etdikdən sonra sülh müqaviləsinin imzalanmasına heç bir maneə yoxdur.

Ermənistanın buna nə dərəcədə hazır olması indi ciddi sualların mövzusudur. Sülh müqaviləsinin mətni nüvə fizikası deyil. Azərbaycanın təklif etdiyi beynəlxalq hüququn əsas prinsiplərinə uyğun olaraq, intensiv ikitərəfli danışıqlar yolu ilə sülh sazişinin mətni daha tez bağlana bilər. Top Ermənistanın meydançasında!”. -0-