Ermənistan hökuməti Qarabağla bağlı danışıqları ilfic vəziyyətinə salır - Hikmət Hacıyev

Bakı/07.03.19/Turan: Ermənistan baş naziri Nikol Paşinyanın martın 4-də Euractiv saytına müsahibəsi ATƏT-in Minsk Qrupu çərçivəsində danışıqların mahiyyətinə və formatına ziddir. Bu barədə Azərbaycan Prezident Administrasiyasının xarici siyasət məsələləri üzrə şöbə müdiri Hikmət Hacıyevin elə həmin saytda dərc edilmiş məqaləsində deyilir.

"Ermənistanın baş naziri "Azərbaycanın işğal edilmiş ərazilərində yaradılmış separatçı rejimin danışıqlara cəlb edilməsi ilə bağlı qeyri-real iddialar irəli sürməyə başlayıb", deyə Hacıyev yazır.

Onun sözlərinə görə, Ermənistan tərəfi bu cür düşüncələrlə bütün danışıqlar prosesini ləngidir və iflic vəziyyətinə salır.

"Ermənistan baş naziri Qarabağda yaşayan ermənilərin adından danışa bilməyəcəyini iddia edərkən, çox sadə bir suala cavab verə bilmir: Ermənistan silahlı qüvvələri Azərbaycan ərazilərində nə edir?". "Ermənistan hökuməti kəlimə oyunu edərək bu qaçılmaz məsuliyyətdən qaça bilməyəcək", deyə Hikmət Hacıyev qeyd edir. -02D-