Ermənistan İrandan qaz idxal etmək istəyir?

Tehran/18.12.18/Turan: Ermənistanın Tehrandakı səfiri Artaşes Tumanyan bazar ertəsi Tehranda bildirib ki, Yerevan İran qazını almaqda maraqlıdır. İRNA agentliyinin məlumatına görə, bu fikir "İran-Ermənistan münasibətləri: imkanlar və çağırışlar" adlı müşavirə zamanı səslənib.

O, Ermənistanın İrandan elektrik ixracının inkişafına hazır olduğunu deyib və yaxın gələcəkdə iki ölkənin ticarət dövriyyəsinin artacağına ümid etdiyini bildirib.

Səfir deyib ki, Ermənistanda hakimiyyət dəyişikliyindən sonra ölkənin xarici kursu dəyişməyib, baxmayaraq ki, Tehranla münasibətlərin məhdudlaşdırılması məqsədilə Vaşinqton Yerevana təzyiq edir. Tumanyanın sözlərinə görə, amerikalılar Ermənistanla İran arasında əlaqələrin əhəmiyyətini başa düşüblər.

Qeyd edək ki, Ermənistanın qaz bazarı Rusiyanın inhisarındadır və Rusiya hər zaman Tehranın Ermənistan bazarına çıxışına qarşı olub. Odur ki, İrandan daha ucuz qaz almaq ideyası məhz Yerevanın xarici siyasi kursunun dəyişməsi demək olacaq.

Eks-prezident Serj Sarkisyana müxalifətdə olan Nikol Paşinyanın tərəfdarları hakimiyyəti İrandan ucuz qiymətə qaz almaq əvəzinə Rusiyadan bahalı qaz almaqda ittiham ediblər.-02D-