Ermənistan rəhbərliyi təcavüzkar siyasət həyata keçirdiyini etiraf edir - Azərbaycan XİN

Bakı/02.09.19/Turan: "Ermənistanın Baş naziri və Prezidentinin Azərbaycanın hazırda Ermənistan silahlı qüvvələrinin işğalı altında olan ərazilərində işğalçı ölkənin yaratdığı oyuncaq separatçı rejimin qondarma "müstəqillik gününü" təbrik edərək, bu ölkənin təcavüzkar siyasətini açıq şəkildə etiraf etməsi, eləcə də işğalçı Ermənistanın siyasi rəhbərliyi ilə yanaşı, diplomatik nümayəndəliklərinin rəhbərlərinin Azərbaycanın işğal olunmuş Dağlıq Qarabağ və ətraf bölgələrinə səfər etməsi onu göstərir ki, işğalçı ölkə beynəlxalq hüququn norma və prinsiplərinin kobud şəkildə pozulması ilə müşayiət olunan təcavüzkar siyasətin nəticələrinə söykənən status-quo vəziyyətinin möhkəmləndirilməsinə yönəlik cəhdlər edir və beləliklə də, münaqişənin sülh yolu ilə həllinə ciddi zərbə vurur", bu barədə Azərbaycan XİN-in mətbuat xidmətinin şərhində deyilir.

"Ermənistan rəhbərliyinin son zamanlar verdiyi tamamilə əsassız bəyanatları və atdığı addımları bu ölkənin öz qanunsuz əməllərinə özünü və öz əhalisini inandırmaq məqsədi güdür. Əks təqdirdə, dünyanın heç bir dövləti tərəfindən tanınmayan, işğalı çoxsaylı sənəd və qətnamələrdə pislənilən və Azərbaycanın beynəlxalq tanınmış ərazilərinin bir hissəsi olan ərazilərdə "mütəqillik bayramını" qeyd etmək başqa nə cür adlandırıla bilər?", deyə press-relizdə vurğulanır.
Azərbaycan XİN qeyd edir ki, münaqişə yalnız Azərbaycanın işğal edilmiş ərazilərinin qaytarılması və regionun hər iki icmasının birgə sülh şəraitində yaşaması şərti ilə nizamlana bilər.

"Münaqişənin digər həll yolu mövcud deyil və ATƏT-in Minsk Qrupunun həmsədrləri qismində beynəlxalq vasitəçilər, habelə bütün dünya ictimaiyyəti bunu gözəl dərk edir", deyə Azərbaycan XİN-in mətbuat xidmətinin bəyanatında qeyd edilir. -06D-