Ermənistan xarici işlər nazirindən fərqli olaraq, Lavrov Qarabağda sülh prosesindən məmnundur

Bakı/06.05.21/Turan: Dağlıq Qarabağda “yerdə” vəziyyət normallaşıb, əhəmiyyətsiz insidentlər rus sülhməramlıları tərəfindən operativ və səmərəli şəkildə nizamlanır. Bu barədə cümə axşamı Yerevanda keçirilən brifinqdə Rusiya xarici işlər naziri Sergey Lavrov bildirib.

“Dağlıq Qarabağ nizamlanmasında müsbət təmayüllər müşahidə edirik. Yerdə vəziyyət xeyli normallaşıb. Rusiya sülhməramlı kontingenti təhlükəsizliyin zamini olaraq çıxış edir. Bu kontingent təmas xətti və Laçın dəhlizi boyunca yerləşdirilib.

Əhəmiyyətsiz insidentlər, - yəqin ki, heç bir əməliyyat onlarsız ötüşmür, - bizim sülhməramlı hərbiçilərimiz tərəfindən operativ və səmərəli şəkildə nizamlanır. Onlar hərbi əsirlərin dəyişdirilməsinin başa çatdırılmasını da daim diqqətdə saxlayırlar”, deyə Lavrov bildirib.

Lavrov həmçinin qeyd edib ki, baş nazir müavinləri səviyyəsində üçtərəfli işçi qrup “aktiv, ritmik işləyir və biz bu işin bundan sonra da davam etdirilməsində və Cənubi Qafqazın sabit iqtisadi inkişafının təmin edilməsi üçün Bakı və Yerevan arasında dialoq qurulmasına şərait yaratmasında maraqlıyıq”.

Lavrov Qarabağla bağlı sülh prosesini siyasiləşdirməkdən çəkinməyə çağırıb. “Bu cəhdlər prosesi tərsinə çevirir”, deyə o qeyd edib.

Öz növbəsində, Ermənistan naziri Ara Ayvazyan yenidən hərbi əsirlərin qaytarılması və ATƏT-in Minsk Qrupu həmsədrlərinin himayəsi altında sülh prosesinin bərpası məsələsini qaldırıb. O, həmçinin Lavrova regionun iqtisadiyyatını bərpa etməsində və tarixi-mədəni irsin qorunub saxlanmasında Qarabağ əhalisinə kömək etmək xahişi ilə müraciət edib. -02D-