Ermənistan XİN maksimalist tələblərdən imtina haqqında tezis irəli sürüb

Bakı/13.05.20/Turan: Ermənistanın xarici işlər naziri Zöhrab Mnatsakanyan MDB ölkələrinin Xarici İşlər Nazirləri Şurasının iclasında geniş nitqlə çıxış edib. Nitqin yekun hissəsində o, Azərbaycanlı həmkarının Dağlıq Qarabağ münaqişəsi ilə bağlı son bəyanatına cavab verib. İclas mayın 12-də videokonfrans formatında keçirilib. MDB XİNŞ-in növbəti iclasının 2020-ci ilin oktyabrında Daşkənddə keçirilməsi planlaşdırılır.

Mnatsakanyan nitqinin böyük hissəsində iclas iştirakçılarını SSRİ-nin Almaniya üzərində qələbəsinin 75 illiyi münasibətilə təbrik edib, Ermənistanda ağır pandemiya vəziyyəti barədə məlumat verib, MDB-də əməkdaşlıq planlarını qiymətləndirib.

Sonda Mnatsakanyan Azərbaycan xarici işlər naziri E.Məmmədyarovun toxunduğu məsələyə reaksiya verib. Mnatsakanyan deyib:

"Bu mövzuda çox danışmayacağam, bu formatda intensiv şəkildə işləməyə davam edirik. Dinc nizamlanmanın alternativi yoxdur, biz praktiki işi hədəf götürmüşük, bu praktiki işi iki il həyata keçirmişik və bundan sonra da davam etdirmək niyyətindəyik. Güc tətbiqi, gücdən istifadə təhdidi qəbul edilmir və bu gün eşitdiyim qeydlər də qəti şəkildə rədd edilir.

Bu münaqişənin həlli güzəşt prinsipinə əsaslanır: bu, həmçinin tərəflərdən hər hansı birinin maksimalist mövqeyi inkar etməsi və bütün tərəflərin tarazlaşdırılmış, möhkəm güzəşt əldə etmək üçün üzərinə götürdükləri öhdəliklərin müqayisəsi deməkdir.

Biz Dağlıq Qarabağ münaqişəsinin müstəsna olaraq sülh yolu ilə nizamlanmasına nail olmaq niyyəti ilə dinc nizamlanma prosesi çərçivəsində bu istiqamətdə işləməyə davam edəcəyik", deyə Ermənistanın xarici işlər naziri bildirib.

O, Ermənistanın maksimalist mövqelərdən imtinasının nədən ibarət olduğunu izah etməyib. Ermənistan mətbuatında Ermənistan XİN-in bu sözləri Dağlıq Qarabağın və Ermənistanın bir dövlət kimi birləşməsindən imtina kimi izah olunur. Orada hesab edirlər ki, Bakı Azərbaycanın işğal edilmiş torpaqlarında müstəqil "Arsax dövlətinin" mövcudluğunu Ermənistan tərəfin güzəşti kimi qəbul etməlidir.

Mnatsakanyanın çıxışı MDB XİNŞ-in virtual iclasında çıxış edən Azərbaycanın xarici işlər naziri Elmar Məmmədyarovun nitqinə cavab olub.

"Dağlıq Qarabağ münaqişəsi Birlik daxilində inteqrasiya potensialını tam həcmdə və səmərəli həyata keçirməyə imkan vermir və MDB-yə üzv dövlətlərin yeni çağırışlara və təhlükələrə qarşı mübarizə məsələsində daha sıx qarşılıqlı fəaliyyəti üçün əsas maneədir. Bu zaman bu gün dünyada hökm sürən reallıqlar yeni çağırışlara, sabitlik və təhlükəsizliyə olan təhdidlərə qarşı daha səmərəli mübarizə və bütün dövlətlərin səylərinin əlaqələndirilməsini tələb edir.

Azərbaycan münaqişənin ən qısa zamanda siyasi həllinə sadiqdir. Bununla yanaşı, danışıqlar əbədi davam edə bilməz və güc tətbiqi, işğal və etnik təmizləmə nəticəsində yaranmış vəziyyətin davam etdirilməsinə və saxlanmasına xidmət etməməlidir", deyə Məmmədyarov bildirib.

O, BMT Təhlükəsizlik Şurasının qətnamələrini, Helsinki Yekun Aktını, Paris Xartiyasını xatırladaraq, Azərbaycanın beynəlxalq səviyyədə qəbul edilmiş sərhədləri çərçivəsində ərazi bütövlüyünü bərpa etmək hüququna malik olduğunu qeyd edib.

"Münaqişələrin dövlətlərin suverenliyi, ərazi bütövlüyü və sərhədlərinin toxunulmazlığı əsasında tezliklə nizamlanması, şübhəsiz, regional və beynəlxalq təhlükəsizliyə, regionda sosial tərəqqiyə və iqtisadi əməkdaşlığın möhkəmləndirilməsinə şərait yaradacaq", deyə Məmmədyarov nitqinə yekun vurub. -0-