Ermənistanda növbəti Azərbaycan casusu tutulub?

Yerevan/08.10.20/Turan: Ermənistanın baş naziri Nikol Paşinyan cümə axşamı bildirib ki, Milli Təhlükəsizlik Xidmətinə Qarabağda əsgərləri cəbhədəki postları tərk etmək üçün yola gətirən insanlar haqqında məlumatı yoxlamağı tapşırıb. Paşinyan Facebook-da yazıb ki, bir neçə gün əvvəl təmas xəttindəki hissələrdən birində hansısa insanlar döyüşən əsgərləri “Nikol torpaqları satıb, bu, əslində razılaşmalı müharibədir, onları bu razılaşmanı gizlətmək üçün ətçəkən maşına atıblar” fikrinə inandırması haqqında mesaj alıb.

“Yola gətirərək və hətta əmr edərək, əsgərləri bəzi döyüş mövqelərini düşmənə tərk edib getməyə məcbur ediblər. Mənim tapşırığımla MTX araşdırmaya başlayıb və Yerevanda işin əsas fiqurantlarından biri, Stepanakert sakini saxlanılıb”, deyə Paşinyan yazır.

“Müxtəlif versiyalar, o cümlədən siyasi təmayül nəzərdən keçirilir, amma hələlik çox şey aydın deyil. Bununla bağlı məlumatı olan həmvətənlərimizi Milli Təhlükəsizlik Xidmətinə müraciət etməyə çağırıram”, deyə Paşinyan qeyd edir.

Onun sözlərinə görə, cəbhədə başqa hissələrdən də bu cür məlumatlar daxil olur. “Hər biri aşkar edilib məsuliyyətə cəlb edilməlidir. Bizim sıralarımızda satqın olmamalıdır”, deyə o yazıb.

Xatırladaq ki, bir neçə gün əvvəl Ermənistan MTX Azərbaycan kəşfiyyatına işləyən Müdafiə Nazirliyinin keçmiş zabitinin həbs edildiyi barədə məlumat yayıb. -02D-