Ermənistanda Rusiyanın ikinci bazası, ermənilərin özününkülər və qarabağlılara bölünməsi

Bakı/24.12.20/Turan: Müharibədə məğlubiyyətdən sonra Ermənistanda ictimai-siyasi böhran çoxsaylı problemləri kəskinləşdirib  və yeni problemlər yaradıb. Onlardan biri də Azərbaycan və Türkiyə qarşısındakı qorxudur. Bu o qədər böyükdür ki, Ermənistanda Rusiyanın ikinci hərbi bazasını (Sünikdə) yaratmaq çağırışları səslənir. Parlamentdə təmsil olunan Maarifçi Ermənistan Partiyasının lideri Edmon Marukyan Dünən belə bir təkliflə çıxış edib.

O, çərşənbə günü mətbuat konfransında deyib ki, hazırda ən vacib məsələ Sünik vilayətinin təhlükəsizliyinin təmin olunmasıdır. Çünki Azərbaycan SQ mövqeləri erməni yaşayış məntəqlərinin yaxınlığındadır.

Marukyan diqqəti ona yönəldib ki, Azərbaycan hakimiyyəti 2021-ci il üçün hərbi büdcəni 2,7 milyard dollaradək artırmağı planlaşdırır ki, bu da 2020-ci ilin göstəricisindən çoxdur.

"Azərbaycan yeni avantüralara hazırlaşır. Bu çağırışlara qarşı durmaq üçün Rusiya ilə yeni bir sazişin imzalanması və Sünikdə bazanın yaradılması üçün danışıqlara başlamaq lazımdır. Onun sözlərinə görə, hətta indi Ermənistanın bütün büdcəsini müdafiə sahəsinə yönəltsə belə, bu vəsait təhlükəsizlik məsələsini müstəqil həll etməyə kifayət etməyəcək. Qeyd edək ki, elə bu yaxınlarda Marukyan tam əks mövqedən çıxış edərək demişdi ki, Ermənistana Rusiya bazası lazım deyil.

Son vaxtların digər aktual mövzusu isə Yerevan ermənilərinin qarabağlılarla açıq düşmənçiliyidir. Hələ Qarabağda hərbi əməliyyatlar zamanı, xüsusilə də müharibədə məğlubiyyətdən sonra hakimiyyətin konsolidasiya çağırışlarına baxmayaraq, Ermənistanda Qarabağ ermənilərinə, əsasən də sosial şəbəkələrdə hücumlar başlayıb. İş o yerə çatıb ki, Ermənistan və Qarabağın ombudsmanları Arman Tatoyan və Artak Beqlaryan vətəndaşlara müraciət edərək nifrət toxumu səpməyi dayandırmağa, düşmən dəyirmanına su tökməməyə çağırıblar, -“Sputnik Armeniya” yazır.

Bütün bunlar Ermənistan dövlətçiliyinə real təhlükədir. “Qoy, qarabağlılar özləri öz Qarabağlarını müdafiə etsinlər” tezisi bunun birbaşa sübutudur. Bu fikir Ermənistanda artıq bir neçə ildir ki, səslənir, lakin son dövrdə olduqca kəskinləşib və sosial şəbəkələrdə qarabağlıları Ermənistandan qovmaq üçün təhqiramiz çağırışlar səslənir. -02D-