Ermənistanda yeni müdafiə naziri

Bakı/15.11.21/Turan: Ermənistan baş nazirinin təqdimatına əsasən, bu ölkənin müdafiə naziri Arşak Karapetyan öz vəzifəsindən azad edilib. Onun yerinə Suren Papikyan təyin edilib, bu təyinat haqqında fərman Ermənistan prezidentinin saytında dərc edilib.

Qeyd edək ki, Ermənistan Müdafiə Nazirliyi rəhbərliyinin növbəti dəfə dəyişməsi sərhəddə vəziyyətin gərginləşməsi və ermənilərin Kəlbəcərlə sərhəddə bir neçə mövqeni və hərbi texnikanı itirməsilə eyni vaxta təsadüf edib.

İndiyədək Papikyan baş nazirin müavini postunu tutub. O, 26 aprel 1986-cı ildə Stepanavanda anadan olub. Yerevan Dövlət Universitetinin tarix fakültəsini bitirib. 2012-2016-cı illərdə Sankt-Peterburq Dövlət Universitetinin aspiranturasında təhsil alıb. 2018-ci ildə ərazi idarəetmə və inkişaf naziri vəzifəsində çalışıb. 2 avqust 2021-ci ildə prezidentin fərmanı ilə Ermənistan baş nazirinin müavini vəzifəsinə təyin edilib.-02D-