Faiq Əmirli 3 il 3 ay müddətinə azadlıqdan məhrum edildi

Bakı/24.07.17/Turan: Bu gün Səbayel Rayon Məhkəməsində hakim Aytən Əliyevanın sədrliyi ilə AXCP sədrinin köməkçisi, "Azadlıq" qəzetinin direktoru Faiq Əmirlinin cinayət işi üzrə məhkəmə iclası keçirilib.

F. mirlinin həyat yoldaşı Lalə Əmirlinin Turan-a verdiyi məlumata görə hökmə əsasən F.Əmirli 3 il 3 ay müddətinə azadlıqdan məhrumetmə və 39 min manat cərimə cəzasına məhkum edilib.

19 iyul məhkəmə iclasında dövlət ittihamçısı "Azadlıq" qəzetinin yayım direktoru, AXCP sədrinin köməkçisi Faiq Əmirliyə 4,5 il həbs istəyib.

Vəkil Aqil Layıcov Turan-a müsahibəsində prokurorun iş istəməsini əsassız adlandırıb.

"Faiq Əmirliyə qarşı irəli sürülən ittihamlar, hətta yuxu və ya hipotetik düşüncə də deyil. İttihamların Faiq Əmirliyə aidiyyatı yoxdur. Ortada hətta yuxu belə olmasa da Faiq Əmirlini ittiham edirlər", - vəkil A.Layıcov qeyd edib.

Onun sözlərinə görə, məhkəmə ittihamların tamam saxta oldğunu sübut edib.

"İstintaqda ifadələrin, disklərin, kitabların saxtalaşdırıldığı sübut olundu. Cinayət işindəki ifadələr də göstərdi ki, bu ittihamların Faiq Əmirliyə, ümumiyyətlə, aidiyyatı yoxdur. Bu işdə məhkəmənin hökmü qanuna yox, vicdana söykənəcək. Hər kəs bilir ki, ittihamın Əmirliyə aidiyyatı yoxdur", - vəkil deyib.

F. Əmirli 2016-cı il avqustun 20-də saxlanılıb. O, əvvəlcə Cinayət Məcəlləsinin 168.1-ci (dini ayinlərin icrası adı altında vətəndaşların hüquqlarına qəsd etmə) və 283.2.2-ci (KİV-dən istifadə etməklə milli, irqi, sosial, dini nifrət və düşmənçiliyin salınması) maddələri ilə ittiham olunub.

2017-ci il aprelin 17-də ona yeni ittihamlar irəli sürülüb - Cinayət Məcəlləsinin 213.1-ci maddəsi (vergidən yayınma) və 308-ci maddəsi (vəzifə səlahiyyətindən sui-istifadə).

F.Əmirli ittihamı "gülünc və sifariş" adlandırıb.-16d-