Fəallar polisin tələbini yerinə yetirməyiblər

Demokratik Qüvvələrin Milli Şurası (DQMŞ) Xocalı faciəsinin növbəti 22-ci ildönümü ilə bağlı çərşənbə günü “Xocalı” memorial-kompleksini ziyarət edərkən polislə qurum üzvləri arasında gərginlik yaşanıb.
Buna səbəb Milli Şura üzvlərinin ziyarətdən sonra metronun “Xətai” stansiyası yaxınlığında yürüşə keçərək şüarlar səsləndirilməsi olub. Milli Şura üzvləri “Xocalıya ədalət!”, “Haqqınızı halal edin!”, “Şəhidlər ölməz, Vətən bölünməz!” kimi şüarlar səsləndiriblər.  Bu şüarlar polisin əsəbi reaksiyasına səbəb olub, polis və ümlki geyimlilər şüarları və yürüşü dayandırmağı, dağılışmağı tələb ediblər. Polis və mülki geyimlilər AXCP sədri Əli Kərimlini dəstənin içindən ayırmağı hədəf seçsələr də fəallar buna imkan verməyiblər.
Polisin yürüşü dayandırma tələbi yerinə yetirməyən Şura üzvləri bir qədər də yürüş etdikdən sonra aksiyanı dayandıraraq bundan sonra dağılmaq haqda özləri qərar veriblər.
AXCP Gənclər Komitəsinin sədri Əbülfəz Qurbanlı polislə qarşıdurmada özünün və ya qurumun hansısa üzvünün xəasrət alması haqda xəbərləri əsassız adlandırıb. -05B-