Feminist Hərəkatının Bakıda 8 Mart aksiyasıYENİLƏNİB (YENİLƏNİB - VİDEO / FOTO)

.Mart 8-də Feminist Hərəkatı Bakının Fəvvarələr Mərkəzindən başlayaraq "8 MARŞ - Bizimdir Hürr Küçələr" yürüşünü keçirib. Aksiyanın əsas şüarı “Şiddətə susma!” olub. Nizami küçəsində polislər aksiyaya müdaxilə edib, onların irəliməsinin qarşısı alınıb.

Polislər aksiya iştirakçılarının qaldırdılqarı plakatları alıblar. İştirakçılardan bir neçə nəfər saxlanılıb. Bununla belə aksiya müxtəlif yerlərdə davam edib.

Aksiyadan əvvəl təşkilatçılar bəyanat yayıblar. Bəyanatda Azərbaycanda baş verən çoxsaylı qadın qətllərindən, selektiv abortlardan, gender əsaslı ayrı-seçkilikdən və zorakılıqdan, erkən nikahlardan, qızların təhsildən məhrum olunmasından və zorla evləndirilmədən, süpürgəçi qadınların təhlükəli iş şəraitində ölümə məruz buraxılmasından, qadın bədəninin istismarından narahatıqlıq ifadə olunur.

Daha sonra qeyd edilir ki, patriarxal dəyərlərin hakim olduğu ölkədə heç bir qadın azad deyil:

“Bunun ən əsas səbəbi dövlətin patriarxal dəyərlərə söykənməsi və vətəndaşlarının təhlükəsizliyini təmin etmək üçün öz öhdəliklərini lazımınca həyata keçirməməsidir”.

Bəyanat müəllifləri bir sıra tələblə çıxış ediblər. Gender və cinsi oriyentasiyasından asılı olmayaraq bütün fərdlərin təhlükəsiz mühitdə yaşamaq və işləmək haqqının, hər kəsə əmək fəaliyyəti üçün bərabər imkanların, hər kəsin təhsilə çatımlılığının, qadınlara qarşı ayrı-seçkiliyin aradan qaldırılması haqqında beynəlxalq konvensiyanın şərtlərinə tamlıqla əməl edilməsini, Azərbaycanın İstanbul konvensiyasına qoşulmasının təmin edilməsini tələb edirlər.

“Toplum TV”nin əməkdaşı Zərifə Novruz-un telefonu tapdanıb, vəsiqəsi cırılıb və qolu burulub. Bu haqda jurnaist özü məlumat verib.-0-

*   *   *

2020 Mart 08 (Bazar) 17:11:44

Bakıda 8 Marş – “Bizimdir hürr küçələr” şüarı ilə feministlər aksiya keçiriblər (YENİLƏNİB)

*   *   *

2020 Mart 08 (Bazar) 16:11:17

Bakıda 8 Marş – “Bizimdir hürr küçələr” şüarı ilə feministlər aksiya keçiriblər

Bakı/08.03.20/Turan:  Martın 8-də yerli vaxtla saat 15:00 radələrində 8 Marş – “Bizimdir hürr küçələr” şüarı ilə feministlər Bakıda aksiya keçirirlər. “Küçələrdən qovma, azadlığı boğma” şüarı ilə başlayıb.

Daha sonra “Susmaq yoxdur, üsyan var” və s. şüarlar səsləndirib, qadın hüquq və azadlıqları ilə bağlı plakatlar qaldırıblar. Aksiya razılaşdırılmadığından polis aksiyaçıların Fəvvarələr meydanından Nizami küçəsinə gedişinə müdaxilə edib.

Akisyanın keçirilməsinə maneə yaradılır. Çox sayda aksiyaçı qadınlar polislərin müşayiəti ilə yürüş edirlər. Onlar "Şiddətə susma" şüarı səsləndirirlər.

Polis onların yürüşünü qarşısını almağa çalışıb. Buna görə onlar canlı səddlər qurublar.

Polislər aksiya iştirakçılarının qaldırdılqarı plakatları alıblar. İştirakçılardan bir neçə nəfər saxlanılıb. Bununla belə aksiya müxtəlif yerlərdə davam edir.

8 mart günü bir sıra postsovet respublikalarında da qadın hüquqları ilə aksiyalar keçirilib. Rusiyanın bir sıra şəhərlərində keçirilən aksiyalarda qadınlara qarşı zorakılıqlar olub. Qırğızıstanın paytaxtı Bişkekdən qadınlara hüquq istəyən qadınlar saxlanılıblar.

Bakı Şəhər İcra Hakimiyyəti (BŞİH) Azərbaycan Feminist Hərəkatının martın 8-də saat 15-də Bakıda, Nizami küçəsindən "Kolorit" kafesinin qarşısına qədər yürüş keçirmək üçün müraciətinə mənfi cavab verib. Meriya yürüşün təşkilatçılarına alternativ yer olaraq martın 8-də Bakıdan 20 kilometr aralıda, Qaradağ rayonu, Lökbatan qəsəbəsində marşrut təklif edib.—06D-