"Fransa müstəmləkəçi keçmişinə və soyqırım aktlarına görə üzr istəməlidir" - İlham Əliyev

Bakı/05.07.23/Turan: Azərbaycan Prezidenti İlham Əliyev Qoşulmama Hərəkatını neokolonizmə qarşı qətiyyətli mübarizəyə qoşulmağa çağırıb.

Azərbaycan artan nekolonizm tendensiyasından çox narahatdır, deyə Əliyev bu gün Qoşulmama Hərəkatının Əlaqələndirmə Bürosunun "Qoşulmama Hərəkatı: yaranan çağırışlara qarşı mübarizədə bir və sarsılmazıq" mövzusunda Bakıda keçirilən nazirlər görüşündə çıxışında bildirib.

Dövlət başçısı qeyd edib ki, "dekolonizasiya prosesi nəticəsində yaranmış Qoşulmama Hərəkatı keçmişin bu bədnam irsinə qarşı qətiyyətlə mübarizə aparmalı və onun tam aradan qaldırılmasına şərait yaratmalıdır".

Onun sözlərinə görə, "neokolonizm siyasətini hələ də davam etdirən ölkələrdən biri Fransadır".

"Fransanın Avropa hüdudlarından kənarda idarə etdiyi ərazilər müstəmləkəçi Fransa imperiyasının iyrənc qalıqlarıdır", deyə Əliyev qeyd edib.

O hesab edir ki, "Fransa müstəmləkəçi keçmişinə və soyqırım aktlarına görə üzr istəməlidir".

Prezidentin sözlərinə görə, "Fransanın idarəçiliyi dövründə soyqırım zamanı 1,5 milyona yaxın Əlcəzair vətəndaşı öldürülüb".

"Əlcəzairin azadlıq döyüşçülərinin kəllə sümükləri hələ də Paris muzeyində hərbi qənimət kimi saxlanılır", deyə Əliyev qeyd edib.

"Biz Fransa prezidenti Emmanuel Makrondan qəhrəmanlarının qalıqlarını Əlcəzairə təhvil verməyi tələb edirik", deyə Azərbaycan prezidenti sözünə davam edib.

O hesab edir ki, Fransa Afrika, Cənub-Şərqi Asiya və digər yerlərdə Qoşulmama Hərəkatının üzvü olan dövlətlərə qarşı “soyqırım aktlarına" görə də üzr istəməlidir.

Dünyada islamofobiyanın və ksenofobiyanın artmasından, habelə islamı zorakılıq və terrorla eyniləşdirmək cəhdlərindən narahatlığını ifadə edən Azərbaycan Prezidenti Danimarkada, Niderlandda, İsveçdə Quranın yandırılmasını və buna söz azadlığı bəhanəsi ilə bəraət qazandırılmasını pisləyib.

Əliyev bu yaxınlarda Fransa polisinin Əlcəzair əsilli 17 yaşlı gənci öldürdüyünü xatırladaraq, bu hadisəni "bu ölkədə irqçiliyin və islamofobiyanın daha bir göstəricisi" adlandırıb.

Özünü yalandan insan hüquqlarının və beynəlxalq hüququn müdafiəçisi kimi qələmə verən Fransa əvvəlki kimi digər ölkələrin daxili işlərinə müdaxilə edir, deyə Əliyev qeyd edib.

Onun fikrincə, Fransa Azərbaycanın Qarabağ regionunda erməni separatizmini dəstəkləyərək, bu bədnam təcrübəsini Cənubi Qafqazda qəbul etdirməyə çalışır.

Əliyev qeyd edib ki, Fransa "özünü Azərbaycanda erməni azlığın müdafiəşisi kimi qələmə verməyə" çalışaraq, eyni zamanda özü "korsika dilini qadağan edir və etnik azlıqlar konsepsiyasını qəbul etmir".

"Bu, ikiüzlülükdən və ikili standartlardan başqa bir şey deyil", deyə Əliyev qeyd edib.

Ermənistanla münaqişənin nizamlanmasına toxunan Əliyev qeyd edib ki, 2020-ci il müharibəsi başa çatdıqdan sonra Azərbaycan "Ermənistanla sülh müqaviləsi imzalanması üçün bir-birinin suverenliyinin və ərazi bütövlüyünün qarşılıqlı olaraq tanınmasına əsaslanan beş əsas prinsipi təqdim edib".

"Ermənistan Qarabağı Azərbaycanın bir hissəsi kimi qəbul etmək məcburiyyətində qalsa da, Rusiya sülhməramlılarının müvəqqəti olaraq yerləşdiyi Azərbaycan ərazisində hələ də erməni silahlı qüvvələrinin qalıqları var", deyən dövlət başçısı əlavə edib ki, Ermənistan həqiqətən regionda çoxdan gözlənilən sülhə nail olmaqda maraqlıdırsa, "onun silahlı qüvvələri Azərbaycanın Qarabağ regionunu tamamilə tərk etməlidir. Erməni hərbiçiləri və yerlərdəki hərbi (qanunsuz) birləşmələr tərksilah edilməli və tərxis olunmalıdır".

Əliyev həmçinin Ermənistanı 10 noyabr 2020-ci il tarixində imzalanmış Üçtərəfli Bəyanatdan irəli gələn öhdəliklərini pozaraq, Zəngəzur dəhlizinin açılmasına mane olmaqda ittiham edib. -06В-