‘Freedom House’ İlham Əliyevə cavab verib

“Freedom House” beynəlxalq hüquq- müdafiə təşkilatı prezident İlham Əliyevin sentyabrın 20-də Avropa Parlamentinin nümayəndələri ilə görüşündə onlarla bağlı söylədiklərini şərh edib.

Turan təşkilatın  saytına istinadən bildirir ki, qurumun fəaliyyətdə olan prezidenti Daniel Calinqaert öz bəyanatında İlham Əliyev hökumətini sərt tənqid edib.

“Prezident Ilham Əliyev son 10 ildə Azərbaycanda insan haqlarının dəhşətli durumu, vətəndaş cəmiyyəti fəallarının və siyasi müxalifətin həbsinə görə ən məsul şəxsdir”, - prezident deyib.

Kalinqaert qeyd edib ki, “Freedom House” Azərbaycanla əlaqədar işini davam etdirəcək.

  “Freedom House Əliyev hökumətinin insan hüquq və azadlıqlarını pozması hallarına diqqəti cəlb etmək üçün öz səylərini davam etdirəcək”,   -bəyanatda vurğulanır.

  Sentyabrın 20-də prezident İlham Əliyev Avropa İttifaqı-Azərbaycan Parlament Əməkdaşlıq Komitəsinin nümayəndə heyətini qəbul edib. Həmin görüşdə ölkə başçısı “Freedom House” təşkilatını qərəzdə günahlandırıb.

“FreedomHouse’ermənipərəst mövqe tutduğuna və Azərbaycana davamlı hücumlar etdiyinə görə ölkəmizin onunla heç bir əlaqəsi yoxdur. Uzun illər “Freedom House”un rəhbəri müxtəlif səbəblərdən Dövlət Departamentindən qovulmuş vəAzərbaycanın ən fəal tənqidçilərindən birinə çevrilmiş Kramer olub. Deyim ki, “FreedomHouse”un hesabatlarının bizim üçün heç bir əsası yoxdur və bu təşkilatın bu sənəddə qeyd olunması məndə təəccüb doğurur. Bu, qeyri-hökumət təşkilatıdır, yüzlərlə belə təşkilat müxtəlif hesabatlar dərc edir”, - dövlət başçısı bildirib.