Fuad Qəhrəmanlını kim hədələyir?

Bakı/23.03.20/Turan: Azərbaycan Xalq Cəbhəsi Partiyasının fəalı Fuad Qəhrəmanlı ünvanına gələn hədələrlə bağlı Azərbaycan DİN başçısına və baş prokuroruna müraciət edib.

Xüsusən, o, WhatsApp-na hədə-qorxu xarakterli mesajlar gəldiyini, siyasi fəaliyyətinə son qoymaq, sosial şəbəkələrdə yazmamaq tələb edildiyini, əks halda "sümüklərini qıracaqları", "onun üçün pis olacağı" ilə hədələndiyini bildirir.

"Əvvəlcə fikir verməsəm  də, bu təhdidlər davamlı xarakter aldığı üçün ictimailəşdirmək və hüquq mühafizə orqanlarına müracət etmək qərarına gəldim. Hesab edirəm ki, həyatım üçün real təhlükə var və buna görə hüquq mühafizə orqanlarından müvafiq tədbirlər görməyi tələb edirəm. Buradan bir daha bəyan edirəm ki, heç bir təhdid, hədə qorxu və təzyiq məni tutduğum mübarizə yolundan döndərə bilməz. Bu çirkin işi təşkil edənlər bilsinlər ki, həyatımı xalqımızın azadlığı, demokratiyaya qovuşması uğrunda mübarizəyə qurban verməyə hər an hazıram və boşuna uğraşmasınlar", deyə Qəhrəmanlı öz Facebook səhifəsində yazıb. 

Qəhrəmanlı ona hədə-qorxu mesajları yazılan 4 telefon nömrəsi dərc edib.

Prefikslərinə görə onlardan ikisi Minnesota ştatına, biri İllinoys, biri isə Kaliforniya ştatına aiddir. -06D-