Gəncə hadisələri Əli Həsənovun şərhində

Bakı/11.07.18/Turan: Gəncə icra başçısına sui-qəsd və bu şəhərdə etirazçılarla qarşıdurma zamanı iki polis əməkdaşının ölümü ilə nəticələnən 10 iyul hadisələri Azərbaycana düşmən qüvvələr tərəfindən planlaşdırılıb. Azərbaycan prezidentinin köməkçisi Əli Həsənovun facebook səhifəsində dərc etdiyi geniş şərhdən belə bir nəticə çıxır.

Həsənov Gəncə icra başçısı Elmar Vəliyevə qarşı sui-qəsdlə bağlı ilk "kriminal hadisə" qiymətləndirməsini inkar etməyə çalışır və bunu hüquq-mühafizə orqanlarının ilk rəyindən əvvəl cəmiyyəti "dövlətin hadisəni nəzarəti altına götürdüyü barədə" məlumatlandırmaq istəməsi ilə əsaslandırır.

Daha sonra o, güc qurumlarının Yunis Səfərovun dini motivləri rəhbər tutması haqqında versiyasını təkrar edir.

Həsənovun iddiasına görə, hələ 2017-ci ilin əvvəllərindən xarici mətbuatda və facebook səhifələrində Gəncə İH başçısının "islamofob və anti-şiə imici yaratmaq cəhdləri olub.

Bu ilin əvvəllərindən isə "müəyyən reket nəşrlərdə Elmar Vəliyevin kobud rəftarı haqqında dərc edilən materialların sayının kəskin şəkildə artması müşahidə olunurdu".

Sui-qəsddən sonra "radikal dini səhifələr və saytlar, Vətənə xəyanət ittihamı ilə mühakimə edilmiş separatçılara bağlı KİV-lər Yunis Səfərovu yeni "gəncəbasar qisasçısı", "qəhrəman" elan etməyə tələsdilər".

Həsənov iddia edir ki, Səfərovu "Leyla Yunusova kimi anti-milli ünsürlər" müdafiə etdi. "Rusiyada "talış separatçısı kimi ad-san qazanmış" İsmayıl Şabanovun, Hollandiyada eyni statusla yaşayan Ələkrəm Hümbətovun çevrəsi cinayətkarın müdafiə komitəsini yaradıb xarici dövlət rəsmilərinə müraciət etdilər", deyə Həsənov davam edir.

"Kimə məxsusluğu bəlli olmayan Ru-clip.ru saytının Youtube kanalı "Səda HD" kimi təqdim olunan şirkət tərəfindən hazırlanmış üsyana səsləyən 5 klip - çağırış yayıb. Beləliklə, biz dövlətçiliyimizə qarşı separatçıların, radikal dindarların, yalnız pula və məişət komfortuna işləyən "iaşə müxalifəti"nin sinxronlaşdırılmış ideoloji təxribatı faktı ilə üz-üzəyik", deyə Həsənov bildirir.

O, xarici qüvvələrə "daxildən dəstək verən, poilis əməkdaşlarına qarşı qəddar cinayətə bəraət qazandırmağa çalışan, yaxud da xaricə qaçıb erməni maliyyəsinin girovuna çevrilənlərin xain canfəşanlığını" başa düşə bilmir.

Belə "həssas vəziyyət" cəmiyyətin, bütün vətəndaşların milli dövlətçilik ətrafında daha sıx birliyini tələb edir.

Həsənov bildirir ki, hüquqazidd əməllərin qarşısının alınacağını bildirir.

"Terrorizmə hər hansı səbəblərdən və ya hər hansı bəhanə ilə bəraət qazandırmaq cəhdləri yolverilməzdir" deyə yazan Həsənov sosial şəbəkə istifadəçilərini və KİV nümayəndələrini "müvafiq qanunvericiliyin tələblərini unutmamağa" çağırır. -06D-