Gürcü Arzusu  Avropa Şurası Parlament Assambleyasında işini dayandırdığını bildirib

Gürcü Arzusu  Avropa Şurası Parlament Assambleyasında işini dayandırır. Bu barədə Gürcüstan nümayəndə heyətinin rəhbəri Tea Tsulukiani bildirib.

O deyib ki, Gürcüstan üzrə qəbul edilmiş qətnamənin şərtləri və bəndləri "qəbuledilməz, ədalətsiz və əsassızdır".

Tsulukianinin sözlərinə görə, Avropa Şurası Parlament Assambleyasının yeni seçkilərin təyin edilməsi tələbi “Gürcüstanın suverenliyini pozur və 1 120 000-dən çox seçicinin (Gürcü Arzusuna səs verənlər)  iradəsinə məhəl qoymur ki, bu da qəti şəkildə qəbuledilməzdir”.

"Bizim bunu qəbul etməmiz seçicilərimizə və bununla da bizim cəmiyyətin böyük əksəriyyətinə xəyanətə bərabər olardı... Yuxarıda göstərilənlərə əsasən, biz, Gürcüstan parlamentinin Strasburqdakı nümayəndə heyətinin üzvləri bu gündən Avropa Şurası Parlament Assambleyasında işi dayandırırıq", - Tsulukiani bildirib və qeyd edib ki, bu, Gürcü Arzusunun  "komanda qərarıdır".

Bununla yanaşı, o qeyd edib ki, Gürcüstan Avropa Şurasının üzvü olaraq qalır və "ədalətsiz münasibət dəyişəndə və şantaja son qoyulanda" Avropa Şurası Parlament Assambleyasında işini bərpa edəcək.

Çərşənbə günü qəbul edilmiş qətnamədə Avropa Şurası Parlament Assambleyası Gürcüstan nümayəndə heyətinin səlahiyyətləri üçün "sınaq müddəti" müəyyən edib, Tbilisini siyasi məhbusların azad edilməsinə, mübahisəli qanunlara yenidən baxılmasına və yeni parlament seçkilərinin təyin edilməsinə çağırıb.