Gürcüstan ombudsmanı hökumətin Əfqan Muxtarlının oğurlanmasına reaksiya verməsini tələb edir

Bakı/31.05.17/Turan: Gürcüstanın xalq müdafiəçisi (ombudsman) Uça Nanuaşvili hesab edir ki, hüquq- mühafizə orqanları azərbaycanlı jurnalist Əfqan Muxtarlının yoxa çıxması faktına dərhal və effektiv şəkildə reaksiya verməlidir. Bu barədə ombudsmanın bəyanatında deyilir.

"Azərbaycanlı jurnalist Əfqan Muxtarlı mayın 29-da axşam saatlarında Tbilisidə yoxa çıxıb. Ailəsinin bildirdiyinə görə, Əfqan Muxtarlının jurnalistika fəaliyyəti Azərbaycan hökumətinin tənqidinə yönəlib. Buna görə Əfqan Muxtarlı davamlı olaraq müxtəlif şəxslər tərəfindən təqib olunub.

Birincisi və ən önəmlisi, bu cinayətin qarşısının alınması üçün bütün vacib addımların atılması lazımdır. Daha sonra bütün əlaqəli şəxsləri ədalət önünə çıxarmaq lazımdır.

Gürcüstan dövləti öz torpaqlarında yaşayan hər kəsin haqlarını qorumalıdır", - bəyanatda deyilir.

"Qonşu ölkələrlə münasibətlər Gürcüstan hökumətinin insan haqlarına sayğısına heç cür təsir göstərməməlidir. Gürcüstanda yaşayan bütün insanlar özlərini təhlükəsiz, qanunların aliliyi mühitində hiss etməlidirlər", - sənəddə vurğulanır.

Bəyanatın sonunda Gürcüstan dövlətinin Əfqan Muxtarlının yoxa çıxmasına etinasızca göz yummasına qınaq ifadə olunur. -0-