Gürcüstanda azərbaycanlıların yaşadığı rayonlarda karantin tətbiq edilib

Tbilisi/24.03.20/Turan: Martın 23-nə keçən gecə Gürcüstan hökuməti Marneuli və Bolnisi bölgələrində sərt karantin rejimi tətbiq edib. Buna Marneulidə bir qadının koronavirusa yoluxması səbəb olub.

Mütəxəssislər güman edirlər ki, yoluxma yüzlərlə insanın, o cümlədən Azərbaycandan gələn qonaqların iştirak etdiyi matəm mərasimi zamanı baş verib.

Qadının vəziyyəti kritikdir. O həmçinin şəkərli diabet və ürək çatışmazlığından əziyyət çəkir. Martın 18-də “pnevmaniya” diaqnozu ilə klinikaya daxil olub və aparılan test nəticəsində koronavirus diaqnozu qoyulub.

Həkimlərin sözlərinə görə, dəfn mərasiminə gələn və ya əlaqəsi olan 1,7 min nəfəri yoxlamaq lazım gələcək. Marneuli rayonunda 130 minə, Bolnisidə isə 80 minə yaxın adam yaşayır, əhalinin əksəriyyəti etnik azərbaycanlılardır.

Karantin zonasına hərbçilər və polis gətirilib, həmçinin çadır və xüsusi texnika gətirən yük maşınları daxil olub. Rayona giriş və çıxışlarda nəzarət məntəqələri qoyulub.

Həmin rayonların sakinlərinə iki həftə ərzində rayonu tərk etmək qadağan olunub. Tibb işçiləri hər ailəyə baş çəkərək onların səhhətlərini yoxlamağı planlaşdırırlar.
21 mart - 21 aprel 2020-ci il tarixləri arasında Gürcüstan ərazisində fövqəladə vəziyyət elan edilib. Sabahdan ölkə şəhərləri arasında sərnişin əlaqəsi - avtomobil və dəmir yolu əlaqəsi dayandırılacaq.02В-