Gürcüstanda güc qurumları görüşə çağırılıb

Tbilisi/03.06.17/Turan: Müxalifət Gürcüstanın daxili işlər naziri Georgi Mqebrişvilini və Dövlət Təhlükəsizlik Xidmətinin rəhbəri Vaxtanq Qomelaurini parlamentə çağırır. Onlardan Azərbaycanlı jurnalist Əfqan Muxtarlının oğurlanması ilə bağlı bütün suallara cavab tələb edəcəklər.

Bu barədə iyunun 2-də keçirilən brifinqdə Gürcüstan Parlamentində "Avropa Gürcüstanı - azadlıq uğrunda hərəkat" fraksiyasının nümayəndəsi Otar Kaxidze bildirib.

"Biz, "Avropa Gürcüstanı" tələb edirik ki, DTX rəhbəri cənab Qomelauri və DİN rəhbəri cənab Mqebrişvili Parlament azlığına daxil olan fraksiyalar qarşısına çıxsınlar və cəmiyyətdə Əfqan Muxtarlının oğurlanması ilə bağlı olan bütün suallara cavab versinlər. Biz mütləq bu biabırçı hərəkətlərə reaksiya verməliyik, onlara cəlb edilmiş bütün şəxslər isə mütləq məhkəmə qarşısına çıxmalıdır", deyə Kaxidze bildirib.

Onun məlumatına görə, Əfqan Muxtarlının oğurlanmasında Gürcüstan kriminal polisinin üç əməkdaşı iştirak edib, habelə DTX və DİN-in yüksək vəzifəli məmurlarının bunda əli olub.

Otar Kaxidze Parlament çoxluğuna müraciət edib və onu bu cür əməllərin yolverilməz olduğunu dərk etməyə və onların iştirakçısına çevrilməməyə çağırıb. -02D-