Gürcüstanın baş naziri Azərbaycanla sərhəddə mübahisəli monastr problemi barədə

Bakı/06.05.19/Turan: Gürcüstanın baş naziri Mamuka Baxtadze hesab edir ki, Gürcüstan -Azərbaycan sərhəddinin hələlik razılaşdırılmayan hissələrinin delimitasiyası və demarkasiyası prosesi asan olmayacaq və çox zaman alacaq.

Azərbaycan sərhədçiləri ölkə ərazisində yerləşən Udabno monastrına gedən yolu bir neçə gün bağladıqdan sonra bu mövzu aktuallaşıb.

Monastr iki ölkə sərhəddi boyunca yerləşən qədim David Qareci (Keşikçidağ) mağara kompleksinin bir hissəsi sayılır. Bu orta əsr mağara kompleksi Tbilisidən 60 km. cənub-şərqdə yerləşir və dağ yamacı boyunca 25 km. ərazini tutur.

Kompleksin Azərbaycanın nəzarətində olan hissəsi, Udabno monastrı daxil olmaqla, dağ ətəyinin qərb yamacında yerləşir.

XİN səviyyəsində danışıqlardan sonra Azərbaycan tərəfi yolu açıb.

"Biz komissiya yaradacağıq, komissiyaya bütün idarələrin nümayəndələri daxil olacaq, delimitasiya və demarkasiya prosesinə başlayacağıq. Bu proses olduqca mürəkkəb və uzundur. Hələlik konkret qərarlar qəbul edilməyəcək, adi yerdəyişmə praktikası qalacaq", - Baxtadze "İmedi" teleşirkətinə müsahibəsində deyib.

"Mən yaxşı başa düşürəm ki, bu, hər bir gürcü, o cümlədən mənim üçün çox emosional məsələdir. Ancaq bir daha hamıdan xahiş edirəm ki, yoxlanılmamış informasiyanın yayılmasına yol verilməsin.

Biz və Azərbaycan dost ölkələrik, strateji tərəfdaşlarıq. Əminəm ki, məsələ bizim münasibətlərin ruhuna uyğun həll ediləcək", - baş nazir vurğulayıb.

Xatırladaq ki, Gürcüstanın Azərbaycanla 446 km. ümumi sərhəddi var. Bunun 30%-i hələlik razılaşdırılmayıb, halbuki, ikitərəfli komissiya bu məsələ ilə 1996-cı ildən məşğul olur.

Ötən gün Gürcüstan sakinləri monastr ərazisində aksiya keçiriblər, Azərbaycan ərazisinə keçərək canlı sipər yaradıblar. Azərbaycanlı sərhədçilər onlara mane olmur.

Aprelin 25-də vəziyyət gərginləşib. Belə ki, gürcü tərəfi bəyan edib ki, Azərbaycan sərhədçiləri monastr kompleksinə gedən yolu bağlayıblar. Monastın gürcü din xadimləri bildiriblər ki, azərbaycanlı sərhədçilər Udabno monastrına girişi qadağan etməyə başlayıblar. -02D-