Hakimiyyətin növbəti hücum obyekti Transparency International-dır

Görünür, hakimiyyətin növbəti hücum obyekti  Transparency International təşkilatı olacaq.  

Belə ki, Milli Məclisin bugünkü iclası Əli Hüseynov və Elmira Axundovanın çıxışları ilə başlayıb. Onlar Transparency İnternational təşkilatının Azərbaycandakı nümayəndəliyi Transparency Azerbaijan-ın  qeyri-obyektivliyindən və zərərli olmasından danışıblar.

Eyni zamanda hər iki deputat “beşinci kolon” ilə mübarizənin vacibliyinə toxunublar, lakin nəyi nəzərdə tutduqlarını açıqlamayıblar.

Sonra deputat Musa Qasımlı “Leyla Yunusun polis zabitinin papağını ayaqlar altına atması”   fonunda polis haqqında qanunun sərtləşdirilməsinə çağırıb. Görünür, deputat hüquq müdafiəçisinin etirazına baxmayaraq, onunla birlikdə tualetə getmək istəyən zabitin papağını yerə atması ilə bağlı insidenti nəzərdə tutur.

Sonra Səyavuş Novruzov bildirib ki, ABŞ Dövlət Departamenti Azərbaycanın işlərinə qarışır və pul verdiyi agenturanı müdafiə edir. Bu vəsait isə ermənilərdən gəlir.

Fəzail Ağamalı deyib ki, hamıdan çox Leyla Yunus belə vəsait alır və o, “hakimiyyətin razılığı” olmadan xarici dövlətlərə səfər edir. Buna son qoymaq lazımdır.

Qeyri-hökumət sektorunun nümayəndəsi olan deputat Azay Quliyev hiddətlənib ki,  Transparence Azerbaijan L.Yunusa qrant verib, təşkilatın hesabatında isə parlament haqqında mənfi rəylər var.

Çıxışları yekunlaşdıran spiker Oqtay Əsədov Leyla Yunus və Rəna Səfərəliyevanı utandıraraq onları Azərbaycan dövlətçiliyini pozmaqda ittiham edib. “Onlar araşdırmaq əvəzinə qarışdırırlar”, - O.Əsədov vurğulayıb.

Qeyd edək ki, bu yaxınlarda Prezident Administrasiyasının hüquq-mühafizə orqanları ilə iş şöbəsinin rəhbəri Fuad Ələsgərov Transparency Azerbaijan-I tənqid edib, onun Azərbaycana dair hesabatlarını qeyri-obyektiv adlandırıb.17-