Hakimiyyətlə hüquq və azadlıqlarla bağlı dialoq davam edir - ABŞ səfiri

Bakı/19.04.22/Turan: ABŞ Azərbaycan hakimiyyəti ilə insan hüquqları məsələləri ilə bağlı dialoqu davam etdirir. Bu barədə çərşənbə axşamı ABŞ-ın Azərbaycandakı səfiri Li Lizenberger Turan-ın Vaşinqtonun Azərbaycanda hüquq və azadlıqların vəziyyətini yaxşılaşdırmaq üçün atdığı addımlar barədə sualına cavabda bildirib.

"Biz Azərbaycan hökuməti ilə bütün səviyyələrdə insan haqları, qanunun aliliyi, demokratiya istiqamətində işləyirik. Bəzi sahələrdə irəliləyişlər görürük, məsələn insan alverinə qarşı mübarizədə uğura imza atmışıq. Bu istiqamətlərdə dialoqumuz yüksək səviyyədə davam edir", deyə səfir qeyd edib.

Azad olunmuş ərazilərin bərpasında iştiraka toxunan diplomat qeyd edib ki, ABŞ şirkətləri bu layihələrdə, o cümlədən minatəmizləmə layihələrində iştirak etməkdə maraqlıdır.

"Bərpa işlərində ABŞ şirkətlərinim iştirakı üçün açıq ictimai tenderlərin mövcudluğu vacibdir, belə olan halda ABŞ biznes sektoru öz təkliflərini verə bilər və prosesə qoşula bilər", deyə səfir qeyd edib.

Lizenberger Vaşinqtonun həll olunmamış məsələlərin həllinin tapılması üçün Bakı və Yerevan arasında birbaşa dialoqu dəstəkləməyə hazır olduğunu təsdiq edib.

"İki tərəf arasında sülhün əldə olunmasına gətirən istənilən təşəbbüsləri dəstəkləyirik. Aİ bu istiqamətdə artıq çox müsbət addımlar atıb və ABŞ Aİ-nin bu təşəbbüslərini dəsətkləyir", deyə səfir bildirib. -16B-