Hələlik müxalifət Milli Şuranın 2 noyabr mitinqində iştirakı ilə bağlı qərar qəbul etməyib

Bakı/28.10.19/Turan:  Müsavat Partiyası Milli Şuranın noyabrın 2-də keçirəcəyi mitinqdə iştirakla bağlı müzakirə  aparır. Bunu Turan-a Müsavat Partiyasının başqanı Arif Hacılı bildirib.

“Müzakirələr başa çatdıqdan sonra ictimaiyyətə açıqlama veriləcək”, - A.Hacılı qeyd edib.

ReAL Partiyasının sədri İlqar Məmmədov bildirib ki, partiya Milli Şuranın noyabrın 2-nə təyin etdiyi aksiyada iştirak etməyəcək.

“Hər bir partiyanın, hər bir siyasi təşkilatın istədiyi vaxtda hansısa yerdə dinc, konstitusion formada aksiya keçirmək hüququ var. Biz aksiya keçirmək hüququnu  dəstəkləsək də Milli Şuranın noyabrın 2-də keçirəcəyi aksiyada iştirak etməyəcəyik”,  o,  Turan-a bildirib.

Klassik Xalq Cəbhəsi Partriyası  Milli Şuranın noyabrın 2-də keçirəcəyi mitinqdə iştirakla bağlı məsələni hazırda müzakirə edir.

“Müzakirələr başa çatdıqdan sonra mətbuata məlumat veriləcək”, - partiya sədri Mirmahmud Mirəlioğlu deyib. 

Xatırladaq ki, Demokratik Qüvvələrin Milli Şurası və Xalq Cəbhəsi Partiyası oktyabrın 19-da başlanmış etiraz aksiyalarının davam edəcəyini bildirib. Növbəti mitinq noyabrın 2-nə təyin edilib.

Hələlik hakimiyyət bu çağırışa reaksiya verməyib. -03B-