Heydər Əliyevin keçmiş işlər müdiri 4 il müddətinə həbs edilib

Cümə günü Bakının Xəzər rayon məhkəməsi Azərbaycan prezidentinin keçmiş işlər müdiri Akif Muradverdiyevi 206.1-ci (qaçaqmalçılıq) maddə ilə təqsirli bilərək, 4 il müddətinə azadlıqdan məhrum edib.

Vəkil Rəşad Mirmehdizadənin Turan-a verdiyi məlumata görə, Muradverdiyev hökmlə razı deyil və ittihamı tamamilə təkzib edir. Hökmdən apellyasiya məhkəməsinə şikayət veriləcək.

Bir müddət əvvəl prokuror Muradverdiyevin 5 il azadlıqdan məhrum edilməsini istəyib.

Xatırladaq ki, Muradverdiyev bu il iyunun 20-də Bakı aeroportunda Moskvaya gedərkən saxlanılıb. İstintaqın məlumatına görə, o, guya özü ilə çar Rusiyası dövrünə aid qızıl sikkələri aparmağa çalışarkən qaçaqmalçılığa görə saxlanılıb. Muradverdiyev bildirib ki, sikkələr onun üzərinə qəsdən atılıb.

2005-ci ilin oktyabrında Muradverdiyev dövlət çevrilişinə cəhd ittihamı ilə həbs edilib, amma sonradan iqtisadi cinayətlərə görə 6 il azadlıqdan məhrum edilib. 2008-ci ilin yanvar ayında o, şərti olaraq vaxtından əvvəl azadlığa buraxılıb.

Müşahidəçilər hazırki həbsin səbəbini Muradverdiyevin seçkilər ərəfəsində müxalif Milli Şura və Moskvada hansısa dairələr arasında müəyyən rol oynaması ehtimalı ilə əlaqələndirirlər.

Rəsmi şəxslər dəfələrlə Kremlin Azərbaycanda Gürcüstan ssenarisini təkrarlamağa və yerli “İvanişvilini” hakimiyyətə gətirməyə çalışdığını deyiblər. -16B06-