Hikmət Hacıyev qarşıdakı Yevlax görüşü barədə

Bakı/20.09.23/Turan: Bugünkü razılaşmalar Ermənistanla Azərbaycan arasında davamlı sülhə nail olmaq yolunda əsas maneələrin aradan qaldırılmasına kömək etdi. Bu barədə  Azərbaycan prezidentinin xüsusi tapşırıqlar üzrə nümayəndəsi, səfir Elçin Əmirbəyov Bakıda akkreditə olunmuş diplomatik korpusun nümayəndələri üçün brifinqdə bildirib.

Azərbaycanın öz ərazisindəki qanunsuz hərbi iştiraka son qoyulması ilə bağlı çoxsaylı çağırışları eşidilməmiş qaldı, ona görə də “bu məsələləri müstəqil həll etmək lazım gəldi”, - Əmirbəyov deyib.

Öz növbəsində ölkə prezidentinin köməkçisi Hikmət Hacıyev bildirib ki, sentyabrın 21-də Yevlaxda keçiriləcək görüşdə Qarabağdakı erməni qüvvələrin tərksilah edilməsi məsələləri müzakirə olunacaq.

"Biz zəmanət aldıq ki, Ermənistanın Qarabağdakı hərbi qüvvələri tərksilah ediləcək, onlar öz hərbi postlarını tərk edəcəklər, bütün hərbi avadanlıq və silahlar Azərbaycana təhvil veriləcək. Bu, Rusiya sülhməramlıları ilə əlaqələndirilmiş şəkildə baş verəcək", - o deyib.

Hacıyev qeyd edib ki, indiki mərhələdə əsas məsələ Qarabağın erməni əhalisinin reinteqrasiyasıdır. Sabahkı görüşdə bu məsələlərin ətraflı müzakirə ediləcəyi gözlənilir. O deyib ki, Qarabağın erməni sakinlərinin sosial-iqtisadi inteqrasiyası Azərbaycanın daxili işidir. Hacıyevin sözlərinə görə, Qarabağın erməni əhalisinin sosial-iqtisadi inteqrasiyası planı artıq hazırdır.

O qeyd edib ki, Azərbaycan Ermənistanla normallaşma prosesinə və sülhə hazırdır, lakin Yerevan qarşıdurmadan əl çəkməlidir.

"Ermənistan hökuməti Azərbaycanın ərazi bütövlüyünü tanıyır, lakin onun diplomatik addımları bunun əksini göstərir".

Ermənistan lazımsız və sülhə mane olan təşəbbüslər irəli sürür. "Biz gələcəkdə Ermənistan-Azərbaycan münasibətlərinin fəal normallaşmasına ümid edirik", - Hikmət Hacıyev vurğulayıb. 06B