Hilal Məmmədovun işi üzrə prosesdə ekspertlərin ifadələri dinlənilib

Bu gün Ağır Cinayətlərə dair İşlər üzrə Məhkəmədə Azər Orucovun sədrliyi ilə “Tolışi sədo” qəzetinin redaktoru Hilal Məmmədovun işi üzrə növbəti qapalı iclas keçirilib.

Vəkil Yalçın İmanovun Turan-a verdiyi məlumata görə, linqvistik və məhkəmə-texniki ekspertizalar üzrə ekspertlərin – Almaz Bayramova və Məmməd Ramazanovun ifadələri dinlənilib.

Ekspert Bayramova bundan əvvəl H.Məmmədovun iki məqaləsində və talış xalqına müraciətində dövlət hakimiyyət orqanlarına qarşı və millətlərarası ayrı-seçilik salan ifadələrə yol verildiyi barədə rəy təqdim etmişdi.

Lakin məhkəmədə ekspert “dövlət hakimiyyəti orqanları” ifadəsinin aydın tərifini və H.Məmmədovun məhz hansı xalqlar arasında ayrı-seçkilik saldığı barədə açıqlama verə bilməyib, deyə vəkil bildirib.

Digər ekspert Məmmədovun fleş-kartına müdaxilə və onun müraciətində dəyişikliklər edilməsi ilə əlaqədar dindirilib. Lakin M.Ramazanov ziddiyyətli ifadələr verib. Belə ki, əvvəlcə o fleş-kartdakı mətnə əlavələr edilə bilməyəcəyini iddia edib ki, daha sonra belə bir dəyişiklik edilə biləcəyini deyib. 

Növbəti məhkəmə iclası aprelin 24-də keçiriləcək.

Xatırladaq ki, 21 iyun 2012-ci ildə həbs edilmiş Hilal Məmmədov üç maddə üzrə ittiham olunur: dövlətə xəyanət, qanunsuz narkotik saxlamaq və milli ayrı-seçkilik salma. Lakin beynəlxalq ictimaiyyət və yerli hüquq müdafiəçiləri onu vicdan məhbusu hesab edir. Saxta dövlətə xəyanət ittihamlarından istifadə edən hakimiyyət prosesi qapalı keçirir. -05СB06-