Hüseyn Abdullayev prezident İlham Əliyevə müraciət edib

Bakı/13.06.20/Turan: Həbsdə olan keçmiş deputat və sahibkar Hüseyn Abdullayev iyunun 18-də Ali Məhkəmədə onun kassasiya şikayətinə baxılması ərəfəsində  prezident İlham əliyevə müraciət edib.

H.Abdullayev hesab edir ki, prezidentə onun haqqında yalan və qərəzli məlumatlar veriblər.

H.Abdullayev Ozünə qarşı aqressiv münasibəti, adekvat olmayan təzyiq və işgəncələri haqq etmədiyini vurğulayan sabiq deputat yada salır ki, qarşıda  Ali Məhkəmədə onun işinə baxılması zamanı ona qarşı cinayət təqibinə son qoymaqla vəziyyəti düzəltmək olar.

Deputat onun Türkiyədə saxlanılmasını və sonra Azərbaycana göndərilməsini “ölkənin beynəlxalq aləmdəki imicinə ciddi zərbə vurmuş insan oğurluğu hadisəsi” hesab edir.

H.Abdullayevin fikrincə, ona bəraət verilməklə vəziyyəti düzəltmək olar.

“Bəraətimi aldıqdan sonra Almaniyaya qayıdıb öz işim və yaradıcılığımla məşğul olub, xalqımız üçün yeni-yeni nəğmələr yazacağam”, - o bildirib.

O həmçinin mərhum prezident Heydər Əliyevlə “yaxın və səmimi münasibətlərini” xatırladır.

*Naxçıvan regionundan olan Hüseyn Abdullayev 1990-cı illərdə neft və neft məhsulları ilə əlaqədar biznesdə aparıcı mövqe tutub. Onun nəzarətində olan bir qrup gənc müxalifətin etiraz mitinqlərinin dağıdılmasında iştirak edib.

2005-ci ildə H.Abdullayev parlamentin deputatı olub və Nazirlər Kabinetinin fəaliyyətini tənqid edib. 2007-ci ilin martında parlament iclasında hakimiyyətyönlü deputat Fəzail Ağamalı H.Abdullayevi münaqişəyə təhrik edib.

Lakin təkcə H.Abdullayevi cəzalandırıblar. Öncə onu həbs ediblər, sonra xuliqanlığa görə 2 il şərti olaraq azadlıqdan məhrum ediblər.

2013-cü ildə Azərbaycandan gedib. Bir müddət sonra ona qarşı vergi ittihamı ilə cinayət işi qaldırılıb.

Almaniyada yaşayan H.Abdullayev kütləvi etirazlara çağıran bir sıra mahnı yazıb və sosial şəbəkələrdə paylaşıb.

2018-ci il aprelin 22-də Almaniyadan Türkiyəyə gəldikdən sonra orada saxlanılıb Azərbaycana ekstradisiya edilib.

Bakıda onu CM-in 192.2.2 (qanunsuz sahibkarlıq, külli miqdarda gəlir əldə etməklə ), 178.2.1 (dələduzluq), 178.2.2, 178.2.4 (dələduzluq), 182.2.1 (bir qrup şəxslə qabaqcadan əlbir olaraq hədə yolu ilə tələbetmə), 182.2.2 (həmin hərəkətlər təkrar törədildikdə) və  182.2.4 (həmin hərəkətlər təkrar törədildikdə,  zərərçəkənə külli miqdarda ziyan vurmaqla) maddələri ilə ittiham olunub.

Fevralın 1-də müttəhimin anası Zeynəb Abdullayeva prezident İlham Əliyevə müraciət edərək oğluna qarşı mərhəmət və humanizm göstərməyi xahiş edib. O, özünün yaşlı olmasını, oğlunun  səhhətində ciddi problemlərin olmasını nəzərə almağı xahiş edib.

Lakin H.Abdullayev 6 il azadlıqdan məhrum edilib.-06D-