İ.Əliyev Bolqarıstan-Serbiya interkonnektorunun açılışında iştirak etmişdir

Bakı/10.12.23/Turan: Dekabrın 10-da Serbiyanın Niş şəhərində Bolqarıstan-Serbiya qaz birləşdiricisinin işə salınma mərasimi olub. Mərasimdə Azərbaycan, Serbiya və Bolqarıstan prezidentləri iştirak ediblər.

Əliyev çıxışında bildirib ki, bu il Azərbaycan Avropaya qaz ixracı 8 milyard kubmetrdən 12 milyard kubmetrə yüksələcək, 2027-ci ilə qədər isə Avropaya qaz ixracının həcmi iki dəfə artacaq.

Serbiyanın dağ-mədən sənayesi və energetika naziri Dubravka Dedoviç Handanoviç daha əvvəl jurnalistlərə bildirib ki, birləşdirici konnektorun gücü ildə 1,8 milyard kubmetr qaz təşkil edəcək və bu, Azərbaycan və Xəzər regionundan gələcək.

Uzunluğu 109 km olan interkonnektor bir il ərzində tikilib və o, Serbiyanın cənub-şərq hissəsinin qazlaşdırılması üçün vacibdir.

Nis-Dimitrovqrad-Bolqarıstan qaz kəmərinin ümumi dəyəri 85,5 milyon avro təşkil edib. Vəsait Avropa İttifaqı tərəfindən - 49,6 milyon avro, Avropa İnvestisiya Bankı - 25 milyon avro kredit və Serbiyanın büdcəsindən ayrılıb.

Bolqarıstan 2021-ci ildən Azərbaycan qazını alır və 2024-cü ilin əvvəlində Yunanıstanın Aleksandrupolis limanı vasitəsilə də mayeləşdirilmiş təbii qaz alacaq. Serbiya 25 ildir ki, bütün qazını Rusiyadan idxal edir, lakin indi təchizatçılar siyahısını genişləndirir. 

Azərbaycan üçün Serbiya Avrozonada öz qazını alan 8-ci ölkə olacaq. 2023-cü ilin noyabrında Serbiyanın Srbijagas dövlət şirkəti ilə Azərbaycanın SOCAR arasında 2024-26-cı illəri əhatə edən müqavilə imzalanıb. Azərbaycan Serbiyaya ildə 400 milyon kubmetrədək qaz tədarük edəcək. Gələcəkdə bu həcm ildə 1,0-1,2 milyard kubmetrə qədər artacaq.-0-