İ.Əliyev: "Danışıqlar prosesinə yeni təkan verilib"

Bakı/30.03.19/Turan: Ermənistanla danışıqlar formatı dəyişməz olaraq qalır, danışıqlarda irəliləyiş var. Bu barədə cümə günü Azərbaycan prezidenti İlham Əliyev TASS agentliyinə bildirib.

"Danışıqlar prosesi humanitar aksiyalarla da dəstəklənməlidir. Danışıqlar formatının dəyişməz olaraq qalması mühümdür, danışıqlar, uzun illər olduğu kimi, Ermənistan və Azərbaycan arasında aparılır, - deyə Əliyev bildirib. - Danışıqlar prosesinə yeni təkan verilib, biz ATƏT-in Minsk Qrupunun həmsədrlərinin 9 mart tarixli bəyanatını müsbət qiymətləndirdik, həmin bəyanatda deyilir ki, danışıqlar formatı yalnız iki tərəfin də razılığı ilə dəyişdirilə bilər".

Onun sözlərinə görə, Bakı buna razılıq verməyib. "Biz elə bir vəziyyətə qayıtmışıq ki, substantiv danışıqları davam etdirmək lazımdır. XİN başçılarına tapşırıq verilib, onlar, çox güman ki, yaxın günlərdə danışıqlar prosesini davam etdirmək üçün görüşəcəklər", deyə Əliyev qeyd edib.

"Danışıqlar prosesi nəticəyə yönəlik olmalıdır, - deyə o bildirib. - Azərbaycan üçün birinci yerdə beynəlxalq hüquq, Helsinki Yekun Aktı və BMT TŞ-nin erməni qüvvələrinin işğal olunmuş ərazilərdən dərhal çıxarılmasını tələb edən dörd qətnaməsinə uyğun Azərbaycanın beynəlxalq aləmdə tanınmış ərazilərinin işğaldan azad edilməsi durur".

Əliyevin sözlərinə görə, danışıqlar konstruktiv şəraitdə keçirilib. "Biz danışıqları müsbət qiymətləndiririk, danışıqlar konstruktiv şəraitdə keçdi. Bu, uzun fasilədən sonra Azərbaycan və Ermənistan rəhbərliyinin ilk rəsmi görüşüdür, əvvəlki görüşlər daha çox tanışlıq xarakteri daşıyırdı və beynəlxalq tədbirlər çərçivəsində keçirilirdi, - deyə o qeyd edib. - XİN başçıları bir neçə mərhələdə danışıqlar aparıblar. Görüş ona görə əhəmiyyətlidir ki, məsələnin mahiyyəti üzrə danışıqlar prosesinə yeni start verilib".

"Biz insanlar arasında əlaqələr çərçivəsində etimad tədbirlərinin möhkəmləndirilməsi ilə bağlı məsələləri müzakirə etdik, - deyə Əliyev sözünə davam edib. - Əvvəllər ictimaiyyət nümayəndələri arasında əlaqələr olub. Yəni hələlik bu barədə (humanitar tədbirlər barədə) danışmaq tezdir".

Paşinyan da Vyanada danışıqların yekunlarını "müsbət" qiymətləndirir. Amma, buna baxmayaraq, o, "sıçrayış" olmadığını bildirib.

"Ümumilikdə görüşü müsbət qiymətləndirirəm. Amma deyə bilmərəm ki, danışıqlar prosesində sıçrayış və ya təkamül var, - deyə TASS Paşinyanın sözlərindən sitat gətirir. - Amma, əsas odur ki, tərəflər problemlər haqqında danışmağa başlayıblar", deyən Paşinyan "prezident Əliyevin də keçən görüşü müsbət qiymətləndirəcəyinə" ümid etdiyini bildirib. -. 06D--