İlham Əliyev hesab edir ki, Azərbaycan Trampın "mənəvi dəyərlərini" bölüşür

Prezident İlham Əliyev ABŞ-da dövlət başçısının dəyişməsindən sonra Azərbaycan-Amerika münasibətlərinin fəallaşmasına ümid edir.

"Tramp hakimiyyətə tamamilə yeni gündəmlə gəlir, onun ilk dönəmində ABŞ-Azərbaycan münasibətlərində heç bir problem olmayıb. Əksinə, onlar çox müsbət idi və biz bir çox istiqamətlərdə irəliləyiş əldə edə bildik", - Əliyev dünən yerli telekanallara müsahibəsində deyib.

Bayden administrasiyasının "əsas səhvi" ondan ibarət idi ki, o, "Amerika-Azərbaycan münasibətlərini ABŞ-Ermənistan münasibətlərinə qurban verdi".

İkincisi, Qarabağ məsələsində ədalətsiz mövqe nümayiş etdirilib. "Mən dəfələrlə və açıq şəkildə Amerika nümayəndələrinə demişəm ki, onlar Ukraynanın ərazi bütövlüyünü tam və bütövlükdə dəstəkləyir, milyardlarla pul ayırır,  silahlandırır. Biz öz ərazi bütövlüyümüzü bərpa etmişik. Bəs bizi nəyə görə cəzalandırmaq istəyirsən? Ancaq cavab gəlmədi", - Əliyev vurğulayıb.

Bayden Administrasiyasının başqa bir "səhvi ""Amerikaya inamı sarsıtmaq" oldu.

"Biz onlara lazım olanda 907-ci düzəliş, yəni sanksiyalar ləğv edildi. ABŞ-ın bizə ehtiyacı olmayan kimi düzəliş yenidən işə salındı. Buna nankorluq deyilir. Hansı etibardan və uzunmüddətli əməkdaşlıqdan danışmaq olar?",- əliyev deyib.

Azərbaycan prezidenti Baydenin Corc Soros medalı ilə təltif olunmasından da hiddətlənib və  əliyevin fikrincə, bu, "bütün maskaları qoparıb".

"Yəni bu, Soros hakimiyyəti idi-həm Bayden dövründə, həm də Trampa qədər səkkiz il ərzində. Buna görə münasibətlərimizdə heç bir irəliləyiş olmadı. Klinton və Corc Buş (kiçik) administrasiyalarında ABŞ ilə ciddi əməkdaşlığın təməlini qoyduq. Bu, Trampın dövründə də davam etdi", - Əliyev deyib.

Onun fikrincə, Tramp Azərbaycan cəmiyyətinin paylaşdığı "dəyərləri təbliğ edir".

"O, ailə dəyərlərini, mənəvi dəyərləri təbliğ edir. Onun ailəsinə baxmaq kifayətdir. İndi başqa ailələr haqqında danışmaq istəmirəm, amma bu mövzu artıq geniş ictimai rezonans doğurub. Təkcə Azərbaycan cəmiyyətinin deyil, bütün ölkələrin ümidləri ondan ibarətdir ki, bu əxlaqsızlığa və mənəviyyatsızlığa son qoyulacaq", - Əliyev qeyd edib.

Onun sözlərinə görə, "cənab Trampın bəyanatlarında çox dəqiq və aydın siqnallar var". Azərbaycan ictimaiyyəti onların əksəriyyətini bölüşür, - Əliyev deyib.

Ancaq o, üç dəfə evli olan, zorlamaya və təcavüzə görə qadınların məhkəmə şikayətlərilə üzləşən Trampın əxlaqının və dəyərlərinin nədə təzahür etdiyini açıqlamayıb.

Bundan əlavə, Əliyev Kanada və Qrenlandiyanın birləşdirilməsinin zəruriliyilə bağlı Trampın bəyanatının müstəqil dövlətlərin ərazi bütövlüyü və suverenliyi prinsipinə necə uyğun olduğunu da izah etməyib.